Anda di sini

SUHAKAM dipinta lengkas bejalaika atur ti patut

ZULHAIDAH
ZULHAIDAH

MIRI: Suruhanjaya Hak Asasi Manusia Malaysia (SUHAKAM) patut jampat bejalaika atur sentang isu 47 iku peranak Malaysia ti ditan ba Kemboja kenyau ari Disember taun nyin tadi laban tu ngaul hak asasi mensia.

Kaban Komiti Exco Nasional Indu PKR, Zulhaidah Suboh madah iya andal enggau nemu tu ngaul pemerat bemacham raban ti bisi rentayan dagang enggau bekenakaka bemacham modus operandi.

“Kitai nganti lalu tentu mega deka nemu, nama atur udah tu dipejalaika SUHAKAM ba penyalah ngemai mensia chara belalai di Malaysia ngagai menua bukai nyengkaum kes pemadu baru, ke Kemboja,” ku Zulhaidah ngagai Utusan Borneo ditu, kemari.

Kenu ku Zulhaidah, kerajaan besai enggau nengeri mega patut matau silik ejensi ti nyendiaka kereja di luar nengeri ungkup pengelikun rayat enggau mega pengelikun menua dudi hari.

Iya madahka pangka negatif ba kes bedagangka mensia tu deka meri pangka ngagai orang nya sereta nangi enggau takut maya sida ngatur pengawa enggau komuniti jemah.

Zulhaidah madahka isu peranak Sarawak antara peranak Malaysia ti ditan ba Kemboja nyadi siti kes ngasuh menua begau.

“Ejensi tu muntang amat bekenaka media rama mantaika jaku tesau aktiviti belalai sida baka nyendiaka kereja begaji besai ngagai sida ti ngiga kereja, ti enda sedarka kereja nya ngaul aktiviti belalai ba menua luar,” ku iya.

“Tu mega siti ari salah guna asai runding enggau batang tubuh ti deka meri pangka besai enggau mangka pengidup dudi hari sida, nyengkaum sida sebilik,” ku iya ti mega Ketuai Indu PKR Sibuti, seraya nyemetak madahka atur tegap mesti dipejalai semua raban dikena nyeliahka penusah ke sama ari betandu, kelebih agi ngaul peranak Malaysia, dikena nyadi ejen bedagangka mensia.

Ba lansa bekaul, iya mega ngansak ejensi perintah bejalaika pengawa meri penerang ngagai mensia mayuh kelebih agi rebak nembiak ti benung gagit ngiga kereja enggau enda kurang mega sida ti ngiga kereja ketegal melanja ruang bilik kelebih agi raban ari ruang bilik seranta.

Ku iya, tebal agi raban nembiak gagit meda gaji dibayar ngena mata duit menua luar kelebih agi dolar Amerika Syarikat (USD) ti disemaya kelimpah pekara tambah bukai baka insentif, bonus, elawin ninting bulan enggau endur diau nadai bebayar, enda sedar sekalika kereja ti disedia nya likun tauka ngelanggar undang-undang sereta bisi risiko tinggi.

Berindik ari nya ku iya, apai indai patut ngaul diri ba pekara tu, nentika kereja ti dipinta bala anak sida nya likun enggau bisi jamin, ukai semina gagitka gaji aja.

Zulhaidah nandu, siti ari strategi besai dikena nagang enggau ngemunaska penyalah bedagangka mensia tu iya nya nempa program meri penyedar ngagai mensia mayuh dikena nempa komuniti ti sedar, bisi tanggungpengawa enggau responsif ngagai pengawa salah, nyengkaum ba renggat pelilih, nengeri enggau antarabansa, ari kerejasama gempung ukai dikuasa perintah (NGO) menua tu tauka menua luar.

“Isu bedagangka mensia tu deka ngamahka nama menua kitai, Malaysia,” ku iya.

Nya alai, Opis Menteri Luar patut beratika pekara tu dikena mutarka iya.