LONG LAMA, Telang Usan: Peranak asal Telang Usan nadai ngira penatai pemisi tauka ekonomi sida mesti naka ulih besimpanka belanja dalam bank tauka saham ti dikemendarka perintah nyadi sebagi ari idup lalu manah agi berengkah ari umur biak.
Kaban Kunsil Nengeri (ADUN) Telang Usan Dennis Ngau, nyemetak madahka orang kaya ba dunya tu iya nya sida ti chukup disiplin ngatur penatai pemisi tauka belanja ti diterima sida, lalu seruran beratika peluang dikena beranakka puku nadai ngira mit tauka besai ari pun.
“Enda ulih dikenggai bisi antara peranak menua pesisir ti bulih untung ba puku diperanakka sida kemaya hari asil ari mendingka jaku ajar ari perintah maya Amanah Saham Nasional (ASB) enggau sukung bukai perintah besai ti dilanchar beberapa taun ke udah.
“Nuju sida tu, aku ngansak terus beratika peluang bukai ti bisi dikena ngemesaika puku kita lalu nuju sida ti apin ngepunka pengawa beranakka puku ti dijamin perintah, manah agi kita berengkah diatu,” ku Dennis.
Ku Dennis, dunya ngelingi kitai majak mayuh peminta tetiap hari.
“Nya kebuah kita anang enda ibuhka pemesai guna bisi duit simpan ti meruan ungkup nuan empu enggau kita sebilik jemah,” ku iya nandu.
Dudi hari ba Sarawak ditu, rayat deka datai ba standard baka ni menua maju ngatur pengidup sida besehari sehari, ke alai tebal agi transaksyen dagang deka nadai ngena mata duit, reti iya, mesti bisi duit simpan dalam bank.
“Dunya deras amat mansang. Kitai enda sedarka pekara tu lalu tu deka datai enda lama agi ba mua pintu diri.
“Nya alai kitai patut besimpanka duit dalam bank enggau berengkah merambu beranakka puku ari diatu,” ku iya ngansak.
Dennis mansutka jaku tu lebuh bejadika pengawa ngelancharka Program Jelajah Pendidikan Kewangan’ diatur Bank Negara Malaysia Kuching ba Dewan SJKC KEE Tee ditu, apin lama ke udah.
Dennis muji Bank Negara Pampang Kuching bejalaika inisiatif ngatur program di Telang Usan, ke alai tebal agi penemu besimpanka belanja udah dikunsi begulai enggau peranak menua pesisir.
“Kitai peranak menua pesisir enda ulih enda beratka pekara tu tauka ngumbai diri kelalu kiruh enggau isu tauka pekara ti nadai mansutka asil sekali. Tetapka ati ransing gawa ngambika nempa idup dudi hari menyana agi ungkup kitai enggau bala anak,” ku iya madah nyemetak.
Dennis mega meri tabi puji nuju Perintah Besai Pakatan Harapan (PH) ti nampung bantu perintah sebedau tu ti suba dikumbai BR1M, tang diatu dikalih nyadi Bantuan Sara Hidup (BSH), ke alai peranak menua pesisir endang begunaka bantu tu dikena napi belanja idup ti niki.
“Taja B1RM sebedau tu kala dikumbai perintah ke diatu siti ari pengawa makai suap tauka ngasuh rayat ngelusu gawa, ba penemu kitai ti nyadi peranak menua pesisir, BR1M tauka BSH tu mayuh nyaup kitai.
“Sentang pekara tu, aku ngansak penerima BSH muka akaun ba Bank Simpanan Nasional ngambi ngelancharka transaksyen bantu. AKu mega ngarapka sebarang program dilanchar ungkup rayat ari perintah sebedau tu sereta ti nyaup rayat kitai maya tusah, deka ditampung perintah ke diatu,” ku iya ngansak.
Ngelansa pekara bekaul bukai, Dennis ngansak bala ketuai genturung pendiau enggau ketuai raban bansa ngelalau enggau meransang pengawa bebelika polisi insurans nyadika penabat nembiak redak sida ba rumah panjai.
“Sehari tu, aku dipadahka Allianz Insurance bisi nyendiaka fasiliti tu lalu berundingka mayuh amat penusah angus rumah panjai selampur nengeri lalu sekeda kes nyadi di Telang Usan, melanja RM80 setaun ungkup isi rumah ti deka mungkur penyampau RM20,000 ditambah enggau pemaik bukai deka mantu napi jam penusah datai.”
Pekara bukai ti bisi disebut Dennis baka pemesai guna dalam idup iya nya insurans penusah bebadi kediri empu.
“Nya kebuah aku meransang, nadai ngira nama batang pengawa kita dalam idup, sida ti melanja ruang bilik patut meli insurans bebadi dikena nentuka sida ti idup enda merinsa maya siku ngenyit nadai, nyendiaka belanja isi rumah,” ku iya nambah.
Program Jelajah Pendidikan Kewangan udah diatur ba Telang Usan ungkup kedua kali.
Dennis ngarapka mayuh agi program baka nya deka diatur dudi hari lalu deka merambu ngatur program nya ba rumah panjai.
“Aku mega deka minta program pelajar pekara wang diatur ungkup bala nembiak ba semua renggat umur enggau sida besai tuai, ngambika sida nemu pemesai guna besimpanka belanja dalam idup ti nadai ngira tikas umur.”
Sama datai ba program sehari nyentuk iya nya Pemesai Pelilih Telang Usan Baru Tai, Pemancha Gilbert Ding, Ketuai Nembiak PBB Telang Usan Kaunsilor Dominic Nyurang, bala ketuai komuniti, ketuai genturung pendiau sereta lebih 200 iku ke bukai.