Anda di sini

DAP S’wak tegap, kering ketegal bansa Dayak

SIBU: Tebal agi raban dalam Parti Tindakan Demokratik (DAP) di Sarawak iya nya bansa Dayak, enti dibida enggau bansa China.

Kaban Parlimen Sibu Oscar Ling madah, penyampau tu mungkur lebih 60 peratus ari semua penyampau raban DAP di nengeri tu.

Iya mega nerangka pekara tu sepengudah Pengawa Bepilih Besai Ke-14 (PRU14) penyampau nya majak nambah.

“Amat, penyampau tu nambah udah PRU14 enti dibida enggau iya ke sebedau tu.

“Di Sarawak, DAP dikeringka semua bansa tang agi mayuh orang bukai madahka DAP tu parti bansa China,” pia ku iya maya ditanya penyampau raban DAP di Sarawak sepengudah PRU14.

Iya mantaika pekara tu maya berandau enggau pengarang berita ba Pengerami Ngintu Taun Baru China ba Indu Opis DAP di Taman Rajang ditu, kemari.

Sama bela datai maya pengerami tu iya nya Kaban Parlimen Lanang Alice Lau, Kaban Kunsil Nengeri (ADUN) Pelawan David Wong enggau ADUN Bukit Assek Irene Chang.

Taja pan baka nya, Ling enda madahka penyampau ke diatu raban DAP di Sarawak laban iya empai bisi penerang bekaul enggau pekara nya.

Nangkan ke nya, iya mega bela ditanya sentang juluk ati DAP Sarawak deka ngirai chalun bansa Dayak bediri ba penuduk bumiputera lebih agi ba sitak tengah maya Pengawa Bepilih Nengeri ti deka datai.

“Tu endang sigi digaga kami baka nganjung chalun di Kapit, Katibas enggau Kanowit (Ngemah) nyengkaum di Pakan ti endang penuduk enggi parti tu.

“Di Kapit kitai bisi beberapa iti penuduk DUN iya nya Bukit Goram, Pelagus enggau Ulu Rajang (Baleh enggau Murum),” ku iya nimbal.

Ditanya udah ke enda DAP Sarawak berandauka pengawa bebagi penuduk, Ling semina madah iya enda ngenggai nyangka penuduk nya dibagi nitihka PRN11.

“Kitai nganti dulu..tang kitai deka mendingka penemu bukai maya baum,” iya ku iya.

Pengerami nya kemari digulu lebih 1,000 iku mensia ari pupu raban bansa belabuh ari 9 pagi.

Mensia mayuh dinah bemacham bansa pemakai kelimpah nembiak mit diberi Ling, Alice, Wong enggau Irene angpau.