LIMBANG: Staf meseti ngereja pengawa enggau pemadu manah ngagai semua serap mensia mayuh lalu anang dikuasa asai ati, emosyen sereta begedika bansa bukai.
Sapit Kepala Menteri Datuk Amar Awang Tengah Ali Hasan madah, nyadi pengereja pengawa perintah sida meseti meretika ‘etika’ kereja ke betul sereta gawa ngagai semua.
“Staf perintah seruran dipinta bejalaika pengawa ke manah, gawa beraban, meretika pengawa diri bisi tanggungpengawa gawa ke semua mensia mayuh,” ku iya ba Pengerami Apresiasyen Karnival Lumba enggau Main Purnama (PURSCAR) ditu malam ensanus.
Sama bisi datai Menteri Muda Betanam Betupi Dr Abdul Rahman Ismail, Ahli Parlimen Lawas, Datuk Henry Sum Agong, MP Parlimen Limbang, Hasbi Habibollah, Residen Bagi Menua Limbang, Ir Ahmad Denney Ahmad Fauzi, D.O Limbang Superi Awang Said enggau D.O Lawas Ladin Atok.
Iya ke mega Menteri Pemansang Mengeri enggau Pengeraja Asal Dua sereta Menteri Pemansang Industri enggau Orang Dagang Sarawak, madahka juluk visyen opis meseti dijapai lalu atur maya bejalaika pengawa enda tau enda dititih baka ti udah ditetapka.
Seriris enggau taun baru 2019, sida ku iya patut majak komited ngagai kereja enggau tanggungpengawa lalu nangkatka nama opis nuju pemujur.
“Ngambika pemujur nya ulih dijapai, kitai enda tau enda bisi juluk ati enggau pengeran sereta perambu ke teratur ngambika kitai ulih meri asil ke pemadu manah ngagai polisi perintah ti di pejalaika,”ku iya.
Berebak enggau nya ku iya, sia patut nemu batang guna bejalaika polisi pemansang kelebih agi ngagai rayat di menua pesisir.
“Nyadi pengereja pengawa perintah kita patut nemu bagi kandang menua ke meseti digaga jalai alun, gaga dulu bagi ke dikemerat kelebih agi ari sukut nyukat tanah enggau ke bukai,” ku iya.
Ngenang pasal PURSCAR, nya sebengkah karnival lumba enggau main ti ngeraika tuubuh enggau runding ti lalu meransang sida rinduka lumba enggau main.
“Enti tubuh gerai, baru kitai bisi pengeransing ngereja pengawa enggau manah sereta ngerapitka kaul enggau ejensi perintah ke bekaul.
Ba karnival nya Tim Landas udah nyadi champion, Tim Jaresda ba lumur dua ditangkanka Opis Betanam Betupi ba penuduk ketiga.
Ba pengerami ke sama, Awang Tengah lalu madahka diri ngungkupka belanja RM50,000 ngagai Tim Sokanjaya JKR Limbang ke nyadi tuai pengatur karnival PURSCAR taun tu.