LAWAS: Perintah nengeri ngemendarka RM20 juta di baruh Kaunsil Pemansang Wilayah Utara (NRDA) dikena ngaga entali ai di Limbang enggau Lawas.
Sapit Kepala Menteri, Datuk Amar Haji Awang Tengah Ali Hasan madahka agih belanja tambah RM10 juta deka diagih dalam timpuh dua taun pejalai projek tu.
Iya madahka tetiap genturung pendiau di bagi menua tu patut mantaika peminta pemansang ngagai NRDA ti ngagihka sepenyampau RM1.5 biliun ti dibantaika Kepala Menteri Datuk Patinggi Abang Johari Tun Abang Openg ba pengawa ngenyampatka pemansang wilayah utara nengeri tu.
“Kepala Menteri Datuk Patinggi Abang Johari Tun Abang Openg setuju ngagihka RM1.5 biliun dalam Bajet Nengeri 2019 dikena bejalaika projek pemansang NRDA ba utara nengeri tu,” ku iya rambau pengawa beripai projek Perintah Nengeri Sarawak (MRP-PPMS) DUN 82 Bukit Sari ba Kampung Bangkatan Merapok kemari.
Sama datai Menteri Muda Betanam Betupi, Dr Abdul Rahman Ismail, Kaban Parlimen (MP) Lawas, Datuk Henry Sum Agong, MP Limbang, Hasbi Habibollah, Residen Bagi Menua Limbang, Ir Ahmad Denney Ahmad Fauzi, Pemesai Pelilih Lawas ke lalu nyadi Chairman Kaunsil Pelilih Lawas (MDL), Ladin Atok, Sapit Chairman MDL, Kr Awangku Jinal Pengiran Jawa enggau Superintenden Opis Tanah enggau Survey (JTS) Limbang, Awang Nazri Awang Saperi begulai enggau pengari ari Direktor JTS Sarawak.
Iya ti mega Menteri Pemansang Mengeri Enggau Pengeraja Asal Kedua enggau Menteri Industri enggau Pemansang Pengawa Dagang Sarawak madahka rayat patut seruran meri kerejasama enggau perintah nengeri di baruh Gabungan Parti Sarawak (GPS) nentuka pemansang ulih dipejalai.
Ku iya, GPS deka seruran ngemeratka pengelantang enggau pemansang nengeri tu nengah bemacham chara ti ngipakka budaya enggau genturung pendiau rayat pupu bansa selampur nengeri.
Ba pengawa nya, Awang Tengah mega nyuaka bayar pampas ngagai 11 iku penerima ti ngaul penyampau kesemua manggai RM1.3 juta.
Ba lansa bukai, lebuh bejadika Bazaar Taun Baru China 2019 di gelanggang bola keranjang Lawas iya dekaka rayat ari bemacham jalai pengarap enggau budaya patut ngetanka pengelantang enggau penegap ke bisi.
“Penyerakup komuniti pupu bansa enggau budaya ba nengeri tu nyadika pengawa dikemeran enggau ditampung ti mesti ditanka semua,” ku iya.
Iya madahka hari besai ba nengeri tu udah diaku nyadi hari besai begulai rayat Sarawak.
“Hari besai tu mega ngerapitka sintal kaul penyerakup rayat ba nengeri tu,” ku iya.