SIBU: Tanjung Manis deka mansang agi enggau penembu 40 buah unit kedai ke digaga bulan November 2015 diatu udah tembu.
Sapit Kepala Menteri Datuk Amar Awang Tengah Ali Hassan madahka projek nya sebagi ari pengeransing perintah nengeri deka nambahka infrastruktur di Tanjung Manis seriris enggau pemansang Genturung Penumbuh Ekonomi Tanjung Manis (T-MEGA).
Iya madah, projek nya ukai semina ngelantangka rayat dia tang tau bendar matak penatai orang luar beranakka puku ngagai nengeri tu.
“Kitai udah meda baka ni pemansang ba ditu alai suba semina bepanggai ba industri ti bekaul enggau kayu.
“Tang diatu kitai meda Tanjung Manis disungkakka enggau manah agi nyengkaum enggau T-MEGA.
“Semua tu nyadi bepun ari kitai ngaga pelin ti serurun ke bela ngemeratka pemaik ngagai rayat,” pia ku iya madah.
Awang Tengah ti mega Menteri Pemansang Mengeri enggau Pengeraja Asal II enggau Menteri Pemansang Indsutri mantaika jaku nya maya Pengawa Nyuaka Kedai Koperasi PUSAKA (KoPUSAKA) Tanjung Manis ditu, kemari.
Projek ngaga 40 unit kedai nya dikemujurka Juraliswa Sdn Bhd nengah kerejasama KoPUSAKA.
Nambahka jaku iya, Awang Tengah madah, penembu rumah kedai nya deka ngelantangka orang beranakka puku bejalaika pengawa sida sebedau ngerembaika dagang bukai.
“Kelimpah ari nya rumah kedai tu ulih dikena kitai nyaup rayat bejalaika pengawa dagang ditu.
“Ukai semina nya, rumah kedai tu nyangka tau digagaka nyadi hostel tauka ‘motel’ nambahka Tanjung Manis endang bisi penau diangkatka,” ku iya madah baru.
Dulu agi ari tu, Chairman KoPUSAKA Sarawak Berhad Hashim Bojet ba jaku iya madahka projek rumah kedai nya beungkus lebih kurang RM20 juta lalu KoPUSAKA bisi lapan unit ke beungkus RM5.84 juta.
Enggau nya ku iya, penyampau semua aset KoPUSAKA diatu manggai RM15.77 juta ari RM9.65 juta sebedau tu.
“Pengawa beranakka puku ba projek rumah kedai tu nambahka penatai KoPUSAKA lalu seraya nya bela ngemansangka Tanjung Manis.
“Kitai mega melabaka aset KoPUSAKA deka nambah ngagai RM20 juta manggai taun 2020,” pia ku iya.
Sama bela datai maya tu iya nya Menteri Muda Pemansang Mengeri, Tanah enggau Rampa Menua Datu Len Talif Salleh, Menteri Muda Pemansang Orang Dagang enggau Dagang Mit enggau Jelan Pemesai Datuk Mohd Naroden Majais, Kaban Parlimen Tanjung Manis Yusuf Wahab enggau Ketuai Pemesai Eksekutis Juraliswa Sdn Bhd Sia Sung Leong.