Anda di sini

Model pemansang ekonomi di Tasik Toronto deka dichunto

Advertisement
 Masing (kanan) nerima chek Skim Bantu Pelajar ari Sharbini seraya dikemata Abang Johari (tengah) di Kuching kemari.
BANTU: Masing (kanan) nerima chek Skim Bantu Pelajar ari Sharbini seraya dikemata Abang Johari (tengah) di Kuching kemari.

KUCHING: Pemansang dalam kandang endur ngelingi palan tekat ai tauka hidro elekterik Bakun, Murum enggau Batang Ai nyengkaum Baleh ke benung digaga deka bechuntoka model Tasik Toronto di Kanada.

Kepala Menteri Datuk Patinggi Abang Johari Tun Openg madah model pemansang ekonomi dalam kandang ngelingi Toronto nya chukup manah.

“Ba taun ke udah aku bisi nemuai ngagai Kanada mai raban ari Sarawak Elektrik Berhad (SEB) enggau raban orang ke bisi kaul enggau palan tekat ai.

“Kami seraban ke menua nya meda model pemansang ekonomi di Tasik Toronto ke alai chara sida chukup manah lalu kitai tau ngambi model nya nyadika chunto,’ku Abang Johari.

Iya mansutka jaku nya ba program nyain Sempekat Pemereti Ati (MoU) Skim Bantu Pelajar ungkup Palan Pengentap Pendiau Bakun ke diberi SEB nengah TanggungPengawa Rama Koporat(CSR) di sebuah hotel ditu, kemari.

Abang Johari nambah, komuniti ke diau ngelingi Tasik Toronto ngambi bagi ba aktiviti ekonomi ke bisi disedia asil program pemansang ke bisi ditusun.

Ngenang kaul ke sama, iya madah perengkaguna kelebih agi atur penyambung jalai alun ba kandang ngelingi Bakun deka digaga manah agi.

Pengawa nya ku iya deka meransang aktiviti betanam betupi sereta industri dagang temuai ti tau mulaika pemaik ngagai peranak ke diau ngelingi.

“Kitai mega merambu numbuhka Ejensi Pemansang Dagang Temuai ti deka ngatur semua aktiviti ke bekaul enggau industri nya,’ku iya.

Palan penyangkai bilun agro di Mabong deka digaga alai kitai mega udah ngagihka belanja dikena ngaga siti agi jalai di Bakun.

Ba sentang MoU ke disain, Abang Johari pechaya pengawa nya ulih ngerapit kaul entara komuniti enggau SEB ke alai ejensi nya mega nyendiaka agih belanja ngagai komuniti( palan pengentap pendiau) di Batang Ai enggau Murum.

Bela datai Sapit Kepala Menteri ke mega Chairman Tabung Amanah Bakun Tan Sri James Masing, Menteri Utiliti Dato Sri Dr Stephen Rundi, Chairman SEB Datuk Abdul Hamed Sepawi, CEO SEB Sharbini Suhaili enggau orang bukai.

  • oleh
  • Advertisement