SIBU: Lebih 400 iku penyereta diperambu datai ngulu ‘2nd Sarawak Conference on Inclusive Early Childhood Education’ ti deka diatur 19-21 Julai ba Kingwood Hotel Sibu.
Chairman komiti pengatur, Dr Toh Teck Hock madah, program tiga hari berunggu nya diatur Tadika Fu Yuan.
“Keterubah program tu diatur kitai ba taun 2017 lalu mujur matak 418 iku penyereta.
“Serak tu kitai melabaka deka matak urung 400 iku penyereta,” pia ku iya madah ba aum media ba Pusat Agape Sibu ditu, ensana.
Ku iya, rambai jaku program taun tu iya nya ‘Accept, Accompany and Achieve’ lalu dikemujurka 11 iku pengelicha ari menua tasik enggau 32 iku pengelicha ari menua tu empu.
“Naka ke diatu, 226 iku penyereta ari Sarawak, Semenanjung Malaysia enggau menua tasik udah nganjung nama.
“Tu nyengkaum penyereta ari Amerika Syarikat, New Zealand, Taiwan, Bangladesh, Myanmar, Indonesia, Singapura, Switzerland enggau China,” ku iya madah baru.
Dr Toh madah, program tu diungkupka raban profesional, pengajar nembiak mit sereta bala apai indai nembiak.
“Pia mega kitai ngelaluka bala pemesai ari opis menteri enggau ketuai raban bansa ti bekaul enggau program intervasi nembiak mit,” ku iya madah.
Program tu ila deka dipenyadi Menteri Pengintu Pengelikun Mensia Mayuh, Orang Indu, Ruang Bilik enggau Pemansang Nembiak Mit Dato Sri Fatimah Abdullah.
Mensia mayuh ti deka ngambi bagi ba program dipinta nganjung nama enda laun ari 31 Januari tu taja pia ngelui ari nya agi ulih diterima tang bayar bisi berubah.