KUCHING: Perintah nengeri benung nyerenih deka ngangkatka Kort Bumiputera ngambika sebaka enggau Kort Syariah enggau Sivil, beduduk ari resolusyen ti dianjung raban bansa Iban di nengeri tu.
Kepala Menteri Datuk Patinggi Abang Johari Tun Openg madah udah minta Sapit Kepala Menteri ti mega Menteri Betanam Betupi Moden,Tanah Adat enggau Pemansang
Ku iya, pansik enda tau enda dipejalaika ti mungkur raban pakar undang – undang enggau evolusyen undang-undang adat ke udah dikena ngelama tu.
“Nya tentu deka mantu ngurangka penanggul ti ditapi raban bansa Bumiputera nyengkaum adat tanah.
“Kekadang maya kita ngatur tanah adat, kita deka ke sekeda langkar undang-undang.
“Majistret mega enda tau enda ngembuan penemu ke tinggi sentang adat ti dikemeran ditu nyengkaum undang-undang di belakang Mahkamah Bumiputera.
“Laban kekadang adat kitai bebida ari Sabah, nya alai ba pikir aku manah agi kitai ngaga pansik dulu,” ku iya lebuh bejaku ba Pengerami Makau Lemai Malam Simposium Budaya Sarawak Ketujuh 2018 di sebuah hotel ditu, malam ensan us.
Kelimpah ari nya, Abang Johari mega madahka perintah nengeri bela deka meda resolusyen ti dikenataika semua bansa nyadika pekara dikemerat sida, sekalika bansa China, Melayu, Bidayuh enggau India.
“Orang China mega ngeletakka resolusyen sentang adat enggau pelajar sida, lalu orang Melayu bejaku sentang tanah pia mega raban bansa Bidayuh enggau India.
“Tang utai ke deka dipadahka aku ditu iya nya (perintah nengeri) deka meda semua resolusyen tu,” ku iya.
Berebak enggau nya, Abang Johari madahka perintah nengeri udah nerima 155 iti resolusyen ari semua etnik enggau bansa di Sarawak, ke dilangkar beserimbai enggau Simposium Budaya ti berambaika leka jaku ‘Menguruskan Budaya dalam Era Digital’ ke diatur semanjau taun siti nyin tadi.
Sama bisi datai Uggah, Menteri Pengelantang Pendiau Komuniti, Orang Indu, Ruang Bilik enggau Pemansang Nembiak Mit, Dato Sri Fatimah Abdullah, Menteri Dagang Temuai, Seni, Adat Asal, Nembiak Lumba enggau Main Datuk Abdul Karim Rahman Hamzah, Menteri Kaunsil Kandang Menua enggau Pengawa Berumah Datuk Dr. Sim Kui Hian sereta Sekretari Perintah Nengeri, Tan Sri Datuk Amar Mohamad Morshidi Abdul Ghani.
Semina Sarawak nengeri di Malaysia ke udah ngatur Simposium Adat dalam tetiap timpuh lima taun, lalu nya udah dipunka dalam taun 1988 maya agi ari baruh iring Tun Pehin Sri Abdul Taib Mahmud.