Anda di sini

Bintara Global Education nyendia awak belajar ungkup nembiak lepas SPM, STPM di Sibu

Advertisement
 Jocky (duduk kiba) enggau bala komiti Kaban Kaunsil Direktor Bintara Global Education.
NYAUP BUMIPUTERA: Jocky (duduk kiba) enggau bala komiti Kaban Kaunsil Direktor Bintara Global Education.

SIBU: Dikena nimbal peransang perintahah nengeri ti deka nyungkak nengeri tu bepenatai pemisi tinggi manggai taun 2030, Bintara Global Education di Sibu nyediaka awak belajar ngagai bala nembiak ti enda mujur bulih setipikit SPM enggau STPM.

Ketuai Sekretari Bintara Global Education, Jocky Jim Ungka madah, palan tu diungkupka ngagai nembiak lebih agi nembiak Bumiputera ke deka ngambi baru tauka ngemanahka agi pemutus peresa SPM enggau STPM sida.

“Sarawak deka nyadi nengeri bepenatai pemisi tinggi ba taun 2030.

“Dikena kitai bejadika juluk ati tu, rayat meseti ngembuan tikas pelajar ke manah.

“Nya alai, Bintara Global Education engkeman dikena kitai nyaup nembiak ngiga pemandai nyentuk nampung pelajar ngagai tikas ke tinggi agi baka Diploma tauka Degree,” pia ku iya madah, kemari.

Nerang enggau silik agi, ku Jocky, dalam kandang sebulan nembiak SPM enggau STPM meseti datai kelas empat kali iya nya maya ujung minggu aja.

“Ngalihka malam mega bala nembiak deka ngambi bagi ba kelas komputer ti enda bebayar.

“Bayar semina bayar belajar enggau mayar bup aja,” ku iya sambil madah chara belajar dia bekena chara belajar baka di palan pelajar tinggi.

Jocky bela madahka awak belajar dia keterubah iya digaga di Malaysia ti mega nerima sida ke enda kala besekula.

Taja pia ku iya, sida meri awak ngagai nembiak ke udah gawa ba pengelama tiga taun ke atas kelimpah nemu macha enggau nulis.

“Ngarapka tu deka mai pemaik ngagai mensia mayuh lebih agi sida ke benung gawa ti deka ngemanahka agi pemutus SPM enggau STPM sida.

“Ditu kami bela nyediaka raban pengelicha ti profesional ti ngembuan graduate,” ku iya madah baru.

Ba pekara bukai, Bintara Global Education udah ngatur aum komiti Kaban Kaunsil Direktor ti keterubah iya di Wisma Sanyan, empai lama.

Ba aum tu, Enggau Unchat dichiri nyadi Ketuai Pemesai Eksekutif lalu Robert Jinga dipilih nyadi Penyanding Penemu kelimpah Jocky nyadi Ketuai Sekretari.

Ngalang Ajan dipilih nyadi Ketuai Wang ditangkan Tinggi Jinga enggau Manggau Renang nyadi komiti.

Pengawa ngerejister nyadi nembiak ba ditu ungkup taun 2019 udah dibuka lalu penerang silik tau ditanya ba lumur 014-9555711 tauka nengah email [email protected].

Advertisement