MIRI: Pengawa nyiri ketuai raban bansa ba Orang Ulu diatur belalauka bup Ordinan Kort Bumiputera 1992 enggau Bup Adet Kayan Kenyah 1994, nya kebuah pengawa nya enda ibuh dipetalat.
Pemancha Gilbert Ding ti ngarika komuniti Kayan Kenyah madah kelimpah pengawa nyiri ketuai raban bansa mesti dipesetujuka ketuai raban bansa enggau peranak genturung pendiau sereta diperati silik ari Opis Pelilih sebedau dianjung ngagai perintah nengeri ngambika dikemendar.
“Nadai gempung bukai ti tau nyiri ketuai raban bansa kelimpah ari perintah nengeri diatu. Nya kebuah kitai patut bebasaka atur pengawa milih tu,” ku iya rambau aum pengarang berita ditu, apin lama ke udah disempulang Penghulu Mering Ibau.
Ku Gilbert nambah, atur pengawa milih belalauka peminta peranak genturung pendiau, ke alai dua ngagai tiga chalun deka dipilih nengah adat orang Ulu ti ditentu maya baum.
“Peranak genturung deka nganjung nama chalun ngagai ketuai raban bansa nyengkaum penghulu, pemancha enggau temenggong ngambi dikerandau enggau diserenih sebedau nama dianjung ngagai opis pelilih.”
“Semina chalun ti dikemendar deka nerima surat chiri ari perintah nengeri. Ukai chalun ti ‘dichiri’ sekeda raban nadai nengah atur pengawa ti patut,” ku iya.
Gilbert meri chunto pemadu manah, pengawa nyiri ketuai raban bansa ti baru ba Long Bedian, Lah Anyie.
Ku iya, pengawa nyirika Lah endang patut laban dipilih peranak genturung pendiau enggau nengah ketuai raban bansa Kayan Kenyah.
“Pengawa nyirika Lah udah dikerandau lebuh baum, timbal, penau enggau penatai asal mega dipesetuju sebedau nama iya dianjung suba,” ku iya.
Penghulu Mering madah, nitihka adat Orang Ulu, tetiap ketuai raban bansa ti dipilih asil ari setuju peranak genturung dulu agi.
Iya ngarapka komuniti Kayan Kenyah mereti enggau bebasaka atur pengawa tu dikena nyaga pengelantang genturung pendiau.