KUCHING: Penyampau orang orang ke tasah ketegal ampuh bah ti dipindah ngagai palan ngenduh ba empat palan nya, di Bagi Menua Kuching, Lundu enggau Sematan, nambah ngagai 133 iku ari 32 buah ruang bilik naka pukul 12 tengah hari kemari.
Sekretariat Komiti Mutarka Penusah Ngenyit Nengeri Sarawak ba sebengkah penerang ditu kemari, madahka di Kuching, 32 iku ari ruang bilik ti tasah ketegal ampuh bah nya udah dipindahka ngagai Dewan Sinar, Kpg Sungai Lumut lalu 27 iku agi ari lima buah ruang bilik ba Surau Ar-Rahman di Kpg Sungai Batu.
Berebak enggau nya, 42 iku ari 11 buah ruang bilik dipindah ngagai Balai Raya Kampung Paon, Lundu, lalu 32 iku ari tujuh ruang bilik diengkah ba Palan Ngenduh SK Sebat, Sematan. — Bernama