MIRI: Orang ti sebaka ke mai UMNO ke Sarawak diatu dipeda benung ngelakuka parti Bersatu dalam nengeri tu.
Chairman Parti Pesaka Bumiputera Bersatu (PBB) Pampang Piasau Kunsilor Sardon Zainal madah, endang enda ulih kitai ngenggaika pemisi parti Bersatu di Miri lalu pia mega di Sarawak berindik ari parti ke tau dikumbi ‘gempung parti ti asa ati’ benung chakah ngelakuka parti nya diatu.
“Taja penyampau sida agi mimit enti dibandingka enggau penyampau kaban PBB sereta parti komponen Gabungan Parti Sarawak (GPS), taja pia, kitai enda tau nejuka pemisi sida tang sama chakah enggau sida ngatur mayuh aktiviti sereta progeam pemansang ungkup GPS sereta PBB,” ku Sardon madah ngagai The Borneo Post kemari.
Iya bejaku munyi tu lebuh ti bejurai pekara bekaul bisi sekeda bala sida nya dipeda bejalaika pengawa ngelakuka parti ari Semenanjung iya nya Bersatu, Parti Keadilan Rakyat (PKR) enggau Parti Tindakan Demikratik (DAP) ba renggat baruh, kelebih agi ngagai raban nembiak ti muntang di dibai sida nengah propaganda ti bejaika parti ti megai perintah nengeri diatu.
Nitih ku Sardon, endang enda dikeenggai bisi sekeda raban nya dipeda ngagihka pom nyadi kaban tauka ngelakuka parti nya nengah mayuh macham chara nyengkaum di pak kupi, maya baum sereta nengah media rama.
Ku iya, raban tu mega entara sida ti kala mai UMNO ke nengeri tu sebedau tu urung enam tauka lapan taun ke udah tang enda mujur narit ati peranak Sarawak.
Iya mega nyemetak madah baka gaya politik diatu, chunto nya di Miri meseti bebendar dikemerat kelebih agi ari pengari rayat GPS laban pekara tu deka ngachau nengah penyereta peranak ba mengeri tu ti masuk ke parti nya majak nambah, nya deka ngeruga penyampau undi ti nyukung GPS.
Ba kenang ke bukai, iya mega madah parti komponen GPS bisi peneleba enggau pengelandik dikena narit sukung enggau penyereta kaban ti masuk nyereta parti nya lalu berindik ari nya patut ngatur pengawa ti nemban enggau lengkas ngambi ulih nyeliaka GPS dialahka parti ti asal ari Smenanjung nya.
Taja pia, ku iya, baka ti dipeda kitai semua iya nya semina GPS pelasar ti engkeman ke ulih negika hak Sarawak sereta pekara ti disemaya dalam Sempekat Malaysia 1963 (MA63) ke meseti dipulaika ngagai peranak Sarawak ukai nya Bersatu, PKR tauka DAP.
Beserimbai enggau nya, nitihka penemu siku kaban PBB Hasnan Ahmad madahka jeman diatu politik endang kuat dalam komuniti kelebih agi bekaul hak Sarawak.
Ku iya, Pengawa Bepilih Nengeri (PRN) 2021 dijangka deka richah agi ari PRN ke sebedau tu laban parti perintah besai Pakatan Harapan (PH) bebendar ngulihka mayuh agi undi ari GPS ti megai perintah Sarawak diatu.
“Ulih dipadah kitai perintah besai belaban enggau perintah nengeri deka mantaika sapa ti manah agi ungkup pengawa bepilih besai ti deka datai,” ku Hasnan kemari.
Iya nandu madahka, GPS iya nya parti komponen asal ari Sarawak tang Bersatu mega bisi ati deka ngetanka hak peranak menua tu nengah S4S.
Diatu, ku iya, mayuh peranak Sarawak ti belalai nyereta Bersatu ti tebuka ungkup semua peranak Sarawak lalu kitai enda ulih ngenggaika parti politik baka PKR, Amanah, DAP enggau Bersatu ti udah begempung enggau perintah besai PH.
“Nya alai, diatu nama ti pemadu beguna GPS meseti bebendar agi gawa dikena narit ati sereta ngamaika semaya ti udah digaga sida ngagai peranak di kandang menua pesisir, rumah panjai sereta mengeri dikena nentuka rayat ulih pechaya perintah nengeri ke diatu,” ku iya madah.
Hasnan nyemetak madahka GPS patut bejalaika pengawa enggau kuat nyema sida deka ngetanka Sarawak, pia mega kitai endang ngarapka parti tu chakah agi dalam pengawa mantu komuniti nengah nyediaka projek ti ulih mai pemaik ngagai komuniti.
Ku iya madah, pengari rayat GPS meseti bejalaika pengawa sida lalu suah begulai enggau rayat ba konstitusyen sida.
Kitai endau ulih semina merambu parti ti ngelaban kitai enda teguh laban pemujur ba pengawa bepilih ti deka datai ditentuka rayat lalu alah tauka menang semua nya bepanggai ba rayat.