KUCHING: Sarawak merambu ngetuka ekspot kayu batang jemah ila lalu beratka atur ngemansut produk berega ari kayu, ku Sapit Kepala Menteri Datuk Amar Awang Tengah Ali Hassan.
Iya ke mega Menteri Pemansang Kandang Menua enggau Pengeraja Asal, madahka pekara nya deka digaga lelubah ngambi ulih meri awak ngagai kompeni ti bisi kaul enggau industri kayu ngatur diri napi ubah nya.
“Dua puluh peratus ari asil industri kayu iya nya kayu batang Sarawak diekspot ngagai menua luar.
“Kitai deka ngurang tikas tu lelubah nyentuk ke maya kitai ulih ngetuka terus ekspot kayu batang tu.
“Maya nya ila, kitai beratka pengawa ngemansut produk berega ari asil kayu,”ku iya.
Awang Tengah mansutka jaku nya ngagai pengarang berita pengudah ngulu pengawa Gempuru Ninting Bulan Perbadanan Kemajuan Perusahaan Kayu Sarawak (PUSAKA) di Wisma Sumber Alam, Petra Jaya ditu, kemari.
Iya nambah, pekara nya mega pia ketegal jemah ila bekal kayu deka datai ari kampung endur kayu ditanam baru.
Ku iya, orang ngempu lisin kayu maya nya ila mega meseti ngulihka ‘setipikit ngintu kampung’ ngambika sida nitihka penetap ke diterit ba pengawa kayu.
“Tuju kitai ngaga pemutus tu ngambika industri kayu seruran tegap.
“Industri tu meseti diangkat manah agi ke alai kitai meseti ngemansutka produk berega ari asil kayu,’ku Awang Tengah.
Nitihka penerang iya, Sarawak ngemansut RM5 juta kubic meter kayu ke alai 80 peratus ari penyampau nya ungkup guna industri kayu di nengeri tu.
Laluh 20 peratus ku Awang Tengah, iya nya kayu batang deka diekspot ke menua luar.
Ba gempuru nya, Awang Tengah bisi ngemata pengawa nyuaka kuasa ngeluar lisin gudang papan ari Opis Kampung Sarawak (JHS) ngagai Pusaka.
Direktor JHS Hamden Muhamad nyuaka surat kuasa nya ngagai Menijar Besai PUSAKA, Hashim Bojet.
Kelimpah ari nya, Awang Tengah ke mega Menteri Industri enggau Pemansang Orang Dagang bisi nyain ‘Dokumen Balance Score Card’(BSC) PUSAKA 2019.
Bela bisi datai Menteri Muda Pemansang Dagang Mit enggau Jelan Pemesai Datuk Mohd Naroden Majais enggau Menteri Muda Pengatur Kandang Mengeri, Tanah Adat enggau Rampa Menua Datu Len Talif Salleh.