Anda di sini

Uggah: Lebih buah deka dibeli ari pekebun negeri tu

Advertisement
 Uggah (tengah) nyadi saksi ngemataka pengawa besilih dokumen entara Chai (dua kiba) enggau Ng (tiga kanan). Sama bisi dipeda Dr Abdul Rahman (kiba) enggau Ik Pahon (dua kanan).
SAMA SETUJU: Uggah (tengah) nyadi saksi ngemataka pengawa besilih dokumen entara Chai (dua kiba) enggau Ng (tiga kanan). Sama bisi dipeda Dr Abdul Rahman (kiba) enggau Ik Pahon (dua kanan).

KUCHING: Opis Betanam Betupi Sarawak udah dipinta ngiga chara meli lebih buah ari pekebun di nengeri tu.

Sapit Kepala Datuk Amar Douglas Uggah Embas madah, ari buah nya ke dibasau, opis nya tau meli lalu nganjung ngagai kilang ngambika diproses nyadi produk ke tau dijual.  “Lebuh aku bejalai sebelah menua pesisir, aku meda mayuh buah rambutan ke dibasau pia aja. Semawa pan enda teempaka buah (rambutan) nya,” ku Uggah madah ngagai media pengudah ngemata pengawa nyain Sempekat Pemereti Ati (MoU) ba Lotus Farm Agritech di Jalai Kapor ditu kemari.

Ku iya, enti asil pekebun nya enda dijual, nya nadai nambahka penatai pemisi sida.  

Bansa buah ke tau diproses, dirangkai sereta dibungkus ungkup makit menua tu tauka entarabansa baka buah nenas, pisang, semangka enggau rian.

Uggah ke mega Menteri Betanam Betupi Moden, Tanah Adat enggau Pemansang Kandang Menua madahka buah rambutan ke udah ‘dehydrated’ pengelama 24 jam ulih ditaruh lama baka buah longan.

“Buah rambutan deka nyadi manis sereta tan agi tauka  manah agi ari longan,” ku iya.

Ngenang pasal MoU, Uggah madahka nya ngemendarka Perintah Sarawak nempa kaul enggau Lotus Farm Agritech be sentang pengawa betanam betupi pintar sereta engkeman kelebih ba fertigasyen.

MoU nya ku iya, mega ngemendarka ba pemesai ari Opis Betanam Betupi Sarawak beratika teknologi ti dikena kompeni dalam sistem betanam betupi fertigasyen sida.  

“MoU tu mega setipak enggau stratergi opis menteri ti dikereja begulai enggau kompeni besai. Kita udah nyain sempekat enggau bebeapa buah kompeni besai beberapa taun ke udah,” ku Uggah.

Ku iya baru, nengah kompeni besai nya sektor betanam betupi nengeri ulih nyingkang ngagai sektor moden nengah chara nambahka produktiviti.

Kelimpah teknologi enggau penemu ari tetiap buah kompeni besai nya, Uggah madahka sukut bukai ti dikemisi kompeni tu iya makit.

“Enti rentayan mekal tu udah bisi, mudah ke kitai (opis menteri) ngemansangka orang bekebun, pekebun mit tauka jelan pemesai tama ngagai peluang makit lalu barang utai tanam sida tau diproses lalu dijual,” ku iya.

Berebak enggau nya, MoU kemari udah disain sereta besilih sua entara pemangku Direktor Opis Betanam Betupi Sarawak Dr Alvin Chai Lian Kuet enggau Direktor Lotus Farm Agritech, Fabian Ng Eng Hieng. Pengawa nyain sempekat nya udah dikemataka Uggah.

Sama bisi datai Menteri Muda Betanam Betupi Dr Abdul Rahman Ismail, Sekretari Mendam Opis Menteri Betanam Betupi Moden, Tanah Adat enggau Pemansang Kandang Menua Datu Ik Pahon Joyik, sapit Direktor Betanam Betupi Sarawak, Ngab Dollah Salam enggau Direktor Lotus Farm Agritech, Hong Boon Kheng.

Advertisement