MIRI: Sarawak patut ngadu pengawa ti holistik ngerumbak baru pengawa ngintu sereta ngatur sistem bekal ai ngambika ukai semina chukup bekal ai beresi tang mega bekal ai ungkup kededua guna domestik enggau industri dalam nengeri tu bisi kualiti.
Menteri Bekal Ai enggau Elekterik Menua Pesisir Dato Sri Dr Stephen Rundi Utom nyemetak madahka pengawa ti holistik ke deka mungkur semua aspek ngintu sereta ngatur bekal ai nyengkaum pekara wang, ngemanah infrastruktur ari sukut fizikal baka nganti paip ti nyau luya, pam ai, sereta loji meresi ai pia mega orang ti ngintu loji nya.
“Kitai patut nukar ulah sereta runding, ari sukut pengereja pengawa enggau penemu sereta bakani deka ngatur semua loji meresi ai, ke dipeda aku bisi sekeda enda dikemata enggau manah lalu bisi palan meresi ai nya mega patut dikemanah.
“Berindik ari nya, tu ukai semina pengawa ngemanah ari sukut fizikal aja, kitai patut ngadu pengawa ngerumbak baru pengawa ngintu sereta ngatur sistem ai,” ku iya madah malam kilah ensana ba pengerami makai lemai ninting taun LAKU Management Sdn Bhd.
Ku iya, dikena sukut agih belanja ti lengkas, perintah nengeri udah nyediaka RM2.8 bilion dikena ngemanah infrastruktur (ari taun 2018-2020) ungkup 251 projek ba kandang menua ti suah napi penanggul bekal ai.
Ku Rundi nambah, Sarawak patut bisi siti standard ungkup kaunsil ai di nengeri tu ngambika ulih diintu sereta diatur enggau efisyen sereta meri servis mekalka ai ti bekualiti.
Beserimbai enggau nya, ku iya, naka ke diatu bisi tiga autoriti ke megai tanggunngpengawa nya, Kuching enggau Sibu Waterboards sereta LAKU Management Sdn Bhd, tang semina LAKU ke kurang meri penusah.
Taja enda bejuraika isu tu enggau silik, iya ngansak raban ti bekaul enggau pekara ngatur sereta ngintu bekal ai beresi ngambika suah ngadu pengawa berunding sereta bejuraika penanggul ti ditapi sentang isu bekal ai baka penyampau ungkus rega ai ti udah lama enda dikerandau kenyau ari suba.
Sentang penyulut sereta pemujur LAKU ke terus nyadi ketuai autoriti bekal ai Sarawak, Dr Rundi udah meri tabi puji enggau sida ti udah sama nyukung bepun ari raban pengatur ti betuaika Dato Ir Alice Jawan ti mega nyadi Sekretari Mendam opis menteri nya, pia mega bala direktor, staff sereta kunteriktor ti udah bebendar bekerejasama ngetanka pemujur sida kenyau ari 23 taun ti udah.
Iya mega ngelalau sida iya nya agi mayuh ti deka digaga kelebih agi dalam dua taun tu – 2019 nyentuk 2020 ti deka nangkup juluk perintah nengeri enggau klien ti randaka bekal ai ti likun enggau kualiti ti manah.
Kelimpah ari nya, iya mega minta semua staf ngambika terus ngangkat indeks penyulut gawa (KPI), lalu ulih terus sama ngemanahka servis sereta kualiti ai ungkup guna industri di Bintulu, nyeliahka bisi kes ai ti keruh kelebih agi maya musim ampuh bah di Miri.
Beserimbai enggau pengerami makai lemai nya, Dr Rundi udah nyuaka bantu sepenyampau RM44,300 ngagai sepuluh raban Gerempung Ukai Dikuasa Perintah (NGO) di Miri ti mega nyadi sebagi ari projek Tanggungpengawa Rama Korporat LAKU.
Entara ti bisi datai ba pengerami makai lemai nya bini Dr Rundi, Datin Sri Loreta Sawot, bala direktor LAKU Management Sdn Bhd baka Sherrina Hussain, Jack Aman Luat enggau Ir Ahmad Denny Ahmad Fauzi, Datuk Bandar Miri Adam Yii sereta Ketuai Eksekutif LAKU Management Sdn Bhd Wong Tiong Kai.