BINTULU: Press Metal merambu makit kompeni nya ba taun 2019 deka napi mayuh penguji berindik ari gaya ekonomi, semekih dalam dunya dagang sereta makit aluminium ti bedau temu penambah dalam dagang tang nyadi tiga bidang besai dalam rintai operasyen di Sarawak dalam taun tu.
Menijer Besai Kumpulan Press Metal Choa Wei Keong madah, tiga bidang besai ti dikemekuh iya nya deka terus bekerejasama enggau tim dagang enggau ngelaku ti deka nyapai paling enda 50 peratus penyampau, nambahka kualiti produk, ngemayuhka produk sereta penyikar gawa.
Ku iya, dikena bejuraika tiga pekara nya nengah komitmen, penyikar gawa, enggau sukung dalam aktiviti nya, Press Metal udah bejalaika mayuh macham program baka PMSys (sistem matau tikas penyulut gawa), program pemansang Injinir enggau Menijer, Sistem Ngatur Tikas Pemanah Gawa, Program Nambahka Operasyen Sarawak, Pengawa ti meruan enggau mayuh agi.
“Kami pechaya ngagai nama ti penawa ti digaga kami deka mantu kami ngulihka penguntung ari atur sepengelama 10 taun iya nya penguntung ti diberi ngagai kami ari pemendar gawa raban pemgepu kompeni, direktor enggau staff ti keterubah gawa.
“Semina sentang komitmen enggau penyikar gawa, nya deka meri penguntung ngagai orang siku siku ti deka nyungkak penatai pemisi nya alai pengidup, visyen enggau gaya kereja deka mai ngagai ‘begulai nempa pemujur jemah ila’,” ku iya lebuh bejaku ba Pengerami Makai Lemai Press Metal BIntulu ba sebuah hotel ditu, bedau lama.
Press Metal Sarawak mega sama begulai ngintu pengerami 10 taun udah ditumbuh ungkup Loji Mukah bedau lama ti udah lalu merambu taun tu endang mayuh penguji sentang operasyen ungkup palan nya dalam taun 2019.
Choa madah, 10 taun ukai pejalai ti muntang tang iya muji raban ti keterubah gawa enggau Press Metal ungkup visyen, pemerani enggau pemendar sida dalam nentuka operasyen hari keterubah operasyen nya di Mukah kelebih agi ungkup Sarawak ulih nyadi nyata.
“Nya ngengkahka pemun kami ti ngembuan 3,650 hari, agi ngitung lalu terus di Sarawak,” ku iya seraya nambah taun 2018 udah mantaika penambah dalam ungkus barang mata ti nyata dalam makit.
“Penambah ungkus barang mata endang tinggi ari rega aluminium. Tang taja pia, belelubah kami nambah baris ‘pemutus bilet’ baru enggau nambahka garis batang dawai, ku iya.
Ku iya madah, berindik ari komitmen enggau penyikar gawa ti udah meri sukung ngagai chara gawa nya alai sida udah nambahka penyampau produk tinggi ari 30 peratus ba taun 2017 ngagai 40 peratus ke nyadi juluk besai korporat sida.
CHoa mega madah Press Metal udah dituku sentang penyulut dagang lalu udah nerima ‘Champion Award’ ungkup Press Metal Bintulu lalu ‘Anugerah Merit’ ungkup Press Metal Sarawak ba ‘Majlis Penganugerahan Alam Sekitar Ketua Menteri Sarawak ke-8 2017/2018’.
Sama bsi datai ba pengerami nya Kaban kunsil Nengeri (ADUN) Samalaju Majang Renggi, Ketuai Pemesai Eksekutif Kumpulan Press Metal Tan Sri Dato Paul Koon Poh Keong, Mandal Chairman Eksekutif Kumpulan Press Metal Koon Poh Ming, Direktor Eksekutif Kumpulan Press Metal Dato Koon Poh Tat, ROy Koon Poh Weng sereta TOny Koon Poh Kong, DIrektor Eksekutif Press Metal BIntulu enggau Press Metal Sarawak Koji Waki sereta Residen Bagi Menua Bintulu Jack Aman Luat.