Anda di sini

SK Batu 36 begunaka balai mayuhguna ti besai dikena bejalaika mayuh macham program

 Alas (ngena nektai), Irwan (rintai belakang) begambar enggau bala nembiak pengudah tembu atur program.
KENANG KITAI: Alas (ngena nektai), Irwan (rintai belakang) begambar enggau bala nembiak pengudah tembu atur program.

SELANGAU: Sekula Primari (SK) Batu 36 di Tamin ditu begunaka balai mayuh guna ti chukup pemesai ke muat alai mensia ba mayuh macham program.  

Kepala Pengajar, Alas Rambli madah, kena Hari Satu tu tadi sida udah ngererak struktur sementara ti nyerara tiga kelas nyadi balai endur sida ngatur program Bantu Gari Sekula.

“Agi mih enda muat endur bala nembiak sekula enggau pengajar ti datai begulai ba siti timpuh.

“Semina apai indai enggau bala pengari nembiak aja ulih duduk dalam balai lalu bala nembiak bukai ba kelas sida empu enggau bala pengajar kelas sida,” ku iya nikalka kenang.  

Ngenang program nya, sepenyampau 268 iku nembiak diberi gari, beg, kasut enggau kereban sekula ti dipelanja Sime Darby Foundation enggau Kelab Rotary Kuching Central.

Ngenang pemanah raban ti melanja, Alas madahka tu pengandal gempung ukai dikuasa perintah deka seruran mantu SK Batu 36 ngatur program enggau aktiviti dikena ngenegapka pemujur dalam akademik.

Pengari Sime Darby Foundation, Irwan Fikri Hamzah, madahka program nya sebagi ari tanggungpengawa rama korporat sida dikena meransang bala nembiak besekula ngambika nyulut ba pelajar sida.  

“Pelajar tu kunchi dikena mansutka diri ari penyeranta,” ku iya.

Sama bisi datai, presiden Kelab Rotary Kuching Central Jong Kiam Ngee, Pemantu Khas Kaban Parlimen (MP) Selangau Simon Joseph enggau Chairman Gerempung Apai Indai enggau Pengajar (PIBG) SK Batu 36 Joshua Jelang.