KUCHING: Sarawak temegah laban udah dipilih endur ngatur Anugerah Televisyen Asia (ATA) Ke-23, ku Menteri Dagang Temuai, Seni, Main Asal, Nembiak enggau Lumba, Datuk Abdul Karim Hamzah.
Karim madah, beduduk ari nya iya ngarika perintah nengeri endang nyukung penuh pengawa ti keterubah endar diatur ba Borneo.
“Enggau baruh ati Sarawak berasai gaga laban udah dipilih endur ngatur pengawa tu. Arapka penatai bala artis tebilang ari 22 buah menua Asia ke ngulu pengawa tu ulih nyaup ngelakuka agi industri eko-dagang temuai Sarawak ke endang dikelala enggau ‘Green Heaven Of Southeast Asia,” ku tandu Karim.
Iya madah munyi nya ba aum pengarang berita bekaul enggau Anugerah Televisyen Asia Ke-23 ke deka diatur ATV Award Sdn Bhd begulai enggau Opis Menteri Dagang Temuai, Seni, Main Asal, Nembiak Lumba enggau Main Sarawak ba Palan Aum Borneo Kuching (BCCK) malam tu.
Nangkan nya, Karim madah Sarawak endang ngembuan penau besai ungkup raban pengemeran industri kreatif di Asia ngerembaika agi pengawa sida.
“Ambika chunto di Sarawak bisi lebih 27 etnik ti bebida main asal baka tanda, mayuh taman negara ke manah alai diteresa ulih dikelaku ngagai menua bukai, ku iya.
Tambah mega, ATA Ke-23 ke diatur ba Kuching chukup manah laban nya siti ari inisiatif ke nyukung kimpin ‘Taun Nemuai Ke Sarawak 2019’ diatur Opis Menteri Dagang Temuai, Seni, Main Asal, Nembiak enggau Lumba Sarawak.
Bisi 42 bengkah kategori pekit deka dipekitka ba ATA dikena meri basa ngagai penyulut karya filem di Asia.
Entara artis tebilang Asia ke dipilih bejalai ba atas karpet mirah ungkup ATA serak tu iya nya, chalun kategori Pelakun Lelaki Pemadu Manah, Cheng Rexen ti melakun ba ‘Schrodinger’s Cat’ enggau Jirayu Tantrakul (Filem Kom Faek tauka ‘The Lost Art’).
Pelakun Pemantu Indu Pemadu Manah, Kim Nam Joo ba filem ‘Misty’ enggau Sinjai Plengpanich ba filem ‘Sri Ayodhaya.
Pengawa nyuaka anugerah tu ulih dipeda terus nengah channel televisyen iFlix, Citra Entertainment, ABS-CBN sereta ba laman facebook @Asiantvawards.
Sama bisi datai Direktor ATA, Koh Jik Seng, Chairman ATA, Lee Keem Whye enggau Sekretari Mendam Opis Menteri Dagang Temuai, Seni, Main Asal, Nembiak enggau Lumba Sarawak Hii Chang Kee.