Anda di sini

Sarawak, Sabah bisi hak nerima chukai ari baruh MA63

KUCHING: Sarawak enggau Sabah patut nerima asil chukai sereta bayar bukai ke diterit ba kededua nengeri.

Pengemata Politik Dr Saudi Narani madahka pekara nya ditetapka ba Seksyen 46, Sempekat Malaysia 1963 (MA63) nengah Genteran 112D.

“Nengah penetap nya nyata mandangka hak Sarawak. Tang nama kebuah isu nya semina dipejurai diatu.

“Lapa enda dipejuraika enggau tebuka dalam timpuh 61 taun ke udah iya nya maya kededua perintah (Nengeri enggau Perintah Besai) ngembuan kaul ti manah dalam Barisan Nasional,’ku iya.

Berindik enggau nya, iya ngenataika tanya sekalika perintah besai bisi mulaika sekeda asil chukai enggau duti ke diterit di Sarawak, ngagai Sarawak.

Semina Perintah Sarawak aja ke nemu ketegal sida nerima asil nya ari perintah besai, tauka enda nerima, ku  Saudi.

Iya nambah, enti enda pia, Sarawak enda deka bebendar nagih semua nya baka ke diatu.

“Perintah besai mega bisi hak enda ngenah pinta nya ke alai pekara nya bepanggai ba pemisi belanja menua.

“Enti perintah besai enggau perintah nengeri enda tejapaika sebarang sempekat sentang isu nya, pekara tu tau diteju ngagai raban pemutus chara ke enda miakka sesapa,’ku iya.

Saudi pechaya isu tu baka ke nadai pengujung ke alai Sarawak patut nguji ngena raban pemutus chara.

Ku iya, pemutus chara nyadi jalai ke patut diambi pengudah aum konsultatif ke diatur kena 17 Disember 2018.