SIBU: Sarakup Indu Dayak Sarawak (SIDS) Sibu deka ngatur Pekit Nenun Pua Kumbu Sarawak Renggat Ke-7 2019 berengkah ari diatu nyentuk 4 Mei tu.
Chairman SIDS Sibu Angelyn Uchi Maseng madahka urung RM20,000 perais disedia ungkup bala pemenang.
“Batang tuju pekit taun tu iya nya meransang raban indu Dayak/Iban kelebih agi rebak biak ngaul diri ba kraf jari nenun Pua Kumbu sereta ngemansang enggau ngetanka kraf jari tu nyadi pengeraja ti patut ditampung semua indu Dayak/Iban lalu nyadi produk makit kraf jari,” ku iya madah ngagai pengarang berita ditu, kemari.
Ku iya, pekit tu berengkah diatur sebarang maya ari diatu lalu bala penyereta diberi timpuh nyentuk 4 Mei awak nembuka asil tenun Pua Kumbu sida.
Atur bukai enggau leman ti ditetap iya nya pekit tu nerima semua penenun ba Sarawak nadai ngira umur, ku iya.
“Ba pekit sekali tu, dibagi ngagai dua kategori aja, Kategori 1: Cotton - Pua Kumbu enggau Kategori 2 - Kain Kebat,” ku iya nerang.
Hari bulan kepenudi nganjung asil tenun sebedau 4 Mei tu.
Tetiap asil tenun mesti diengkah chap tauka kelai ‘Tenun SIDS SIBU 2019’ ba tisi kain ungkup dua kategori nya. Kriteria diperati baka ti dilis, Reka bentuk/Ukir (40 peratus), Chura (mesti chura asal aja) (30 peratus), Komposisi/Penulin/ Asal (15 peratus) enggau Pemanah Kereja/Pengalus tenun/Kreativiti (15 peratus).
“Pemutus pekit enggau pengawa nyuaka perais deka dibantai urung bulan Mei ila. Taja pia, pekara tu agi dikerandauka kami lalu kitai deka madahka hari bulan enggau endur iya ila,” ku iya nambah.
Sebarang tanya silik enggau asil tenun mesti dianjung ngagai Uchi di c/o Majlis Daerah Luar Bandar Sibu (SRDC), Wisma Sanyan, 96000 Sibu (016-8825861), Priscilla Bunsi David, c/o Pejabat KEMAS Sibu, Tingkat 8, Wisma Persekutuan Blok 3, 96000 Sibu (019-8771840/084-333560) taukaMundun Undau c/o Sibu Water Board (016-8783894) sebedau 4 Mei tu.
Pom nyereta mega tau dibatak ari website SIDS www.sids-sibu.blogspot.com tauka diambi ari sekretariat SIDS Sibu.
Berindik ari nya, mensia mayuh ba nengeri tu ti bisi penau nenun Pua Kumbu diperansang nyereta pekit tu.
Uchi ti nyadi chairman pengatur pekit seraya komiti bukai iya nya Mundun Undau (tukang wang), Claudia Dieo (sekretari) enggau Priscilla Bunsi David (penyelaras).
Kaban komiti mit bukai iya nya Monica Giri, Michelle Hildalyne, Magdalen Sinah, Magdaline Sigie, Catherine Kundau, Loryna Leman, Senorita Salleh, Tuai Rumah Catherine Tamoh enggau Regina Emu.