MIRI: Dikena nentuka raban Polis Diraja Malaysia (PDRM) meri servis ti manah sereta bejalaika gaya pengidup ti bepengerai, siti program ‘Trim and Fit’ udah diatur ninting minggu ti bepalan ba Indu Opis Polis miri (IPD).
Program nya ti diatur begulai enggau TFC FIT Miri tauka dikumbai Geng Tayar Miri udah berengkah kenyau ari bulan November 2018 lalu udah disereta urung 100 iku raban polis bemacham pangkat nyengkaum Ketuai Polis miri ACP Lim Meng Seah enggau sapit iya Supt Mohd Sabri Zainol.
Ku Lim madah, kelimpah ari ngemeranka gaya pengidup ti bepengerai, program ti diatur ninting pagi Hari Lima tu dikena mantu raban polis nentuka sida seruran regas batang tubuh, nurunka pemerat tubuh lalu mega nyadi sebagi ari atur dikena niki pangkat.
“Semua raban ti enda nadai ngaga operasyen endang diperansang datai nyereta program tu paling enda dua kali sebulan lalu tu mega sebagi ari polisi perintah ke udah dipadahka iya nya raban polis ti ngelui pemerat tubuh ti patut sereta enda pas Body Mass Index (BMI) enda ulih enggau nyadi chalun ti tau niki pangkat.
“Tu siti [rogram ti manah sereta ngemeratka pengerai batang tubuh. Nya alai, kitai beterima kasih ngagai TFC FIT ti udah meri peluang ngatur program tu enggau enda bebayar lalu ketegal penanggul jam kereja program tu digaga sekali seminggu ba IPD Miri tang nya nitihka raban polis ditu empu nyema deka ngaga aktiviti pengerai bakatu ba palan bukai. Semina ninting Hari Lima program tu endang udah diungkupka ba IPD Miri,” ku iya madah ngagai The Borneo Post sepengudah program nya kemari.
Program tu berengkah ari pukul 6.30 pagi lalu betuaika Jurulatih TFC FIT Adanan Idi tauka dikangau Coach Nan ke ngembuan peneleba dalam aktiviti bepengerai bakatu sepengelama 27 taun.
Saritu (12 Januari) enggau pagila, TFC FIT mega deka ngatur program ke sebaka ba ‘Jom Jelajah Sihat’ di Bintulu lalu penerang ti silik ulih ngelawa ngagai laman media rama ‘Facebook’ sida Transformer Fitness Bootcamp.