SIBU: Manggai 11 Januari 2017 nyadi hari bulan ti chukup besai reti ngagai peranak nengeri tu pengudah siku ketuai siruka rayat, iya nya ex-Kepala Menteri Sarawak yang kelima, niang Pehin Sri Adenan Satem midang.
Taja genap dua taun pengudah niang midang kemari, pengeransing gawa, pengawa dikereja enggau ditegika iya ungkup rayat Sarawak seruran dikenang nyentuk sehari tu.
Ba pekara tu, Menteri Muda Pelajar enggau Pansik Teknologi Dr Annuar Rapa’ee ngarang siti kenang dituju ngagai ketuai ti rindu agi dikangau ngena nama Tok Nan ba laman ‘Facebook’ iya, kemari.
Dr Annuar dalam kenang iya madahka pemidang niang balat ngenyitka ati semua orang lalu tu ukai semina ngenyit puang tang mega kelalu tumu laban rayat agi begunaka iya nyadi ketuai.
“Agi mayuh dipinta kami ari nuan.
“Nuan ngajar kami pasal pengelurus ba pejalai kami gawa negika hak kitai (Sarawak) dalam Perintah Besai Malaysia, sebuah menua ti udah dikemansang begulai lalu deka meda penumbuh nya kenyau ari taun 1963,” ku iya.
Kelimpah ari nya, lebuh ba Aum Kunsil Nengeri, Dr Annuar madahka niang Tok Nan nyadi chunto enggau mentor iya sereta siku ketuai ti chukup dipebasa.
“Nuan ngajar aku nyadi siku pemidato ti landik enggau nunjukka aku chara mantaika peminta rayat.
“Nuan madahka kami enda kakang ati tauka ngeri maya mataika peminta rayat laban, baka orang bukai, nuan mega dipilih rayat ngambika diau ba ‘August House’.
“Pengeregas enggau peminta nuan chukup gah lalu enda ulih dialah, tajam enggau teguh,” ku Annuar.
Dr Annuar dalam kenang iya mega mantaika diri temegah ati laban diberi awak dalam tim ti diberi nama ‘Adenan Team’.
Ku iya, tu meransang enggau ngemai iya angkun agi sereta ransing gawaka Sarawak.
“Nuan nempa kami nyadi ketuai ti bisi tanggungpengawa enggau komited gawa nempa Sarawak ti begempung, lantang enggau maju.
“Siti jaku terima kasih enda chukup dikena ngayanka pemesai jasa nuan ba pengawa ngembing, meri pechaya enggau lalau ti meransang kami nyadi pengari rayat ti manah.
“Aku deka seruran ngenang nuan nyadi ketuai ti bisi karisma enggau altruistik lalu mantaika pengeransing gawa ba servis ngagai rayat, pemaik ti deka seruran beguna nyentuk rebak dudi hari,” ku iya.
Ba lansa bukai, Dr Annuar mega bisi bekunsika beberapa lambar gambar kenang begulai enggau niang Tok Nan dalam laman Facebook iya.