Anda di sini

KGBS nulak CPR nyadi subjek ba sekula, palan pelajar tinggi

AHMAD MALIE
AHMAD MALIE

SIBU: Gerempung Pengajar Bumiputera Sarawak (KGBS) nulak langgur penemu Resusitasi Kordiopulmonari tuaka CPR diangkat nyadi subjek enda tau enda diajar ba sekula enggau palan pelajar tinggi ba menua tu.

Presiden KGBS, Ahmad Malie madah, taja langgur penemu nya manah tang iya nangika tu deka nyadi tating tambah ngagai bala pengajar kelimpah begunaka sida ngulu kus ti bekaul enggau CPR.

Ku iya, maya CPR tu diangkat nyadi siti ari subjek tentu mega deka meri pangka ngagai jam gawa ti diungkup dalam rintai pengawa ninting minggu ngajar lalu pekara tu deka nating bala pengajar.

“Tang KGBS bepenemu manah agi raban aktivis empu minta pemendar ari Opis Menteri Pelajar (KPM) meri licha tauka kus betimpuh bekaul enggau CPR tu ba sekula tauka palan pelajar.

“Nuju raban aktivis rama sebarang pangku pengawa sida beratika pangka ari pejalai langgur penemu nya ngagai bala pengajar,” ku iya kemari.

Ahmad madah, kebuah KGBS nulak langgur penemu nya laban sekeda pengajar nadai ngembuan sebarang penau ba pekara ti bekaul enggau CPR.

“Tu deka nating bala pengajar laban sida mesti ngulu kus ti bekaul enggau CPR,” ku iya.

Apin lama ke udah, siku aktivis rama pegari nama, Datuk Seri Ang Lai Soon, ti mega Chairman Kaunsil St John Ambulance Sarawak minta perintah ngangkatka CPR nyadi subjek enda tau enda diajar ba semua sekula enggau palan pelajar tinggi ba menua tu.

Ku Lai, iya andal amat perintah besai ti baru ukai semina deka nyukung langgur penemu nya, tang mega bejalaika nya enda lama agi.

Kelimpah ari nya, KGBS mega nulak langgur penemu bukai baka program nyaga pemeresi rampa menua enggau nyaga jelu bela nyadi subjek baru ba sekula enggau palan pelajar tinggi.

Ahmad madahka sekula enggau palan pelajar ukai endur manggai tauka ngelempaika sebarang bansa langgur penemu ti ngandalka bala pengajar nyadi raban bejalaika pengawa.

Kebuah pia laban KGBS pechaya bala nembiak tau diajar pasal pemerat CPR ukai semina nengah penemu ngangkatka CPR tu subjek enda tau enda diajar laban bisi chara bukai ti nemban agi.

“Ambika chunto, raban aktivis rama nya tau minta ngagai KPM ngambika meri licha tau kus ti betimpuh ba sekula tauka palan pelajar,” ku iya nerang.

Ku iya, tu deka nyadi praktikal agi enggau udah chukup ba penemu KGBS lalu ukai nya ngangkatka CPR nyadi subjek enda tau enda diajar ba sekula.