Anda di sini

Kaban JKKK dipinta ngena pelasar ke betul mantaika sebana, langgur penemu

Advertisement
 John (tiga kiba) beratika dokumen pasal spesifikasyen projek seraya bala pemesai JKR enggau ketuai genturung pendiau ngemata.
NGABAS: John (tiga kiba) beratika dokumen pasal spesifikasyen projek seraya bala pemesai JKR enggau ketuai genturung pendiau ngemata.

KUCHING: Kaban Kunsil Nengeri (ADUN) Bukit Semuja John Ilus udah beratika sekeda kaban Komiti Pemansang Enggau Pengelikun Genturung Pendiau (JKKK) ti rindu agi mantaika sebana ba media rama sentang projek genturung pendiau ari ke ngemai isu nya ngagai raban bekuasa bekaul.

Ku iya, bala kaban JKKK ti nyadi mata enggau pending perintah patut nemu agi bekenaka pelasar ti betul endur sida mantaika sebarang sebana tauka langgur penemu pasal projek.

Nya alai iya minta sida meri kerejasama ngagai raban kunteriktor, ejensi bejalaika pengawa enggau Opis Residen sereta Opis Pelilih ngambika pejalai projek perintah mujur enggau lanchar ba genturung pendiau sida.

“Sida patut nemu dini endur ti patut mantaika sebana tauka langgur penemu ngagai raban bekuasa bekaul ari ke mantaika pekara nya ba media rama ti tau ngemai pangka enda manah ngagai rayat.  

“Nya kebuah, beri kerejasama rat enggau semua kunteriktor, ejensi bejalaika pengawa enggau Opis Residen sereta Opis Pelilih ba sebarang projek ti udah dikemendar enggau deka dipejalai ba kandang menua nya. Ari ulah baka nya, tau ngenyampatka agi projek tembu,” ku iya rambau pengawa nyuaka projek Program Transformasyen Menua Pesisir (RTP) di Serian apin lama ke udah.

John ngaku pekara ti nyadi maya projek dipejalai, tentu bisi betalatka penemu pasal kereja ti digaga, spesifikasyen enggau peminta.

“Enti pekara tu nyadi, atur randau enggau ejensi bejalaika pengawa sereta mega raban kunteriktor endur mantaika penemu. Bisi maya sida enda setuju laban sekeda kriteria kereja mesti datai enggau sekeda peminta, tang aku pechaya, sida deka mending lalu nerang kebuah sida,” ku iya.

Berebak enggau nya, John nyuaka tiga projek ngagai kunteriktor bejalaika pengawa. Projek tu datai ari agih belanja taun nyin tadi (2018), iya nya projek ngemanah enggau ngaga stor baru ba surau Kampung Sorak Melayu, ngaga opis JKKK baru, stor enggau dapur ba Kampung Ranchan sereta nangkir enggau ngemanahka agi Gerija St. Pio, Kpg. Slabi Entukuh.

Ku John, kesemua penyampau agih belanja belanja tiga projek tu manggai RM480,000.

Kelimpah ari bala kunteriktor, raban JKKK ari tiga genturung pendiau nya, bala pemesai enggau injinir ari Opis Kereja Raya (JKR) Serian sereta bala pemesai ari Opis Residen Serian mega bisi datai.

Ba taun 2018 ku John, bisi 27 bengkah projek di baruh RTP ungkup Bukit Semuja.

“Bisi kedua udah tembu, ke bukai benung digaga lalu sekeda agi benung dalam atur pengawa diambi sereta tikas langkar,” ku iya nambah.

Ngelansa pekara bukai, John madahka iya udah nerima mayuh sebana pasal penanggul ngumpul uras nyentuk ujung taun 2018 di pasar Serian enggau kandang menua ngelingi.

Sebana bukai iya nya pasal penanggul tisi jalai repa enggau babas enda ditebas ba sepanjai jalai di Serian, ku iya nambah.

“Aku udah nerangka penanggul nya telempai ba raban kunteriktor. Raban kaunsil kandang menua udah gawa mutarka iya lalu kitai ngarapka penanggul tu deka teputar enda lama agi.

“Ba penanggul babas tinggi kin kia, penerang udah dibantai ba media. Kitai ngarapka penanggul tu deka teputar enda lama agi,” ku iya.

Advertisement