Anda di sini

CNS deka ke BIW diserenih baru

KUCHING: Kongres Gempung Gerempung Pekereja Dalam Servis Perintah (CUEPACS) Negeri Sarawak (CNS), minta Bayar Insentif Wilayah (BIW) ungkup orang gawa perintah di nengeri tu diserenih baru.

Chairman CNS, Ahmad Malie madah tikas bayar nya udah kelalu lama enda diserenih ke alai ke penudi diserenih perintah besai urung 15 taun ke udah.

“Ketegal orang gawa perintah di Sarawak enda disengkaum ba elawin beridup(COLA), CNS minta Menteri Pengatur Pengereja Pengawa, M.Kula Segaran berunding nyerenih baru ba sentang elawin nya ungkup Sarawak.

“Ungkup orang gawa perintah di Sarawak, bayar insentif wilayah tu nyemaka COLA lalu diberi enggau tuju ngelempungka tating belanja sida.

“CNS ngarap Menteri Pengatur Pengereja Pengawa ulih berundingka pinta tu ungkup pemaik enggau pengelantang orang gawa perintah ke meri servis di nengeri tu,’ku Ahmad.

Iya nambah, CNS sedia ngaga aum enggau opis menteri tauka menteri ba sentang BIW enti pekara nya dikedeka sida.

Bayar insentif wilayah diberi ngagai pemesai perintah ke asal ari Sarawak enggau Sabah ke dichiri tauka diasuh gawa di Semenanjung nengah ikas ke ditetap bepelasarka gaji puku.

Kelimpah diberi ngagai pemesai perintah ari Sarawak enggau Sabah, insentif tu mega diberi ngagai pemesai ari Semenanjung ti gawa di Sarawak enggau Sabah.

Ngenang kaul ke sama, M. Kula kemari madah opis menteri berunding deka nyerenih baru COLA ke alai ke penudi bayar tu diserenih iya nya ba taun 2012.

Tajapan pemesai perintah di Sarawak enda disengkaum dalam COLA, CNS mega ngelaluka pengeran perintah nyerenih baru COLA alai nya sigi ungkup pemaik enggau pengelantang raban pengereja pengawa perintah ketegal ungkus beridup ti majak niki.

CNS ku iya ngarap pengawa nyerenih baru nya ukai semina digaga ba COLA tang mega bela beratka bayar insentif wilayah ngagai pemesai perintah di Sarawak.