Anda di sini

Amanah Kuala Rajang ngelempung tating apai indai meri bantu kereban sekula

KUCHING: Parti Amanah Negara (Amanah) Sarawak  Pampang Kuala Rajang ngambi inisiatif mantu apai indai ke kurang penatai pemisi nengah pengawa meri bantu kereban sekula apin lama ke udah.

Ketuai pampang iya, Adris Subeli madah, piak iya ngatur program nya dikena ngurangka tating belanja bala apai indai ke kurang penatai pemisi meli kereban sekula anak.

“Puji Tuhan, taja musim sekula udah dibuka, tang kami tetap bejalaika program baka nya kelebih agi ngagai nembiak ke nadai kala nerima bantu sekula ari sebarang piak sebedau tu,” ku iya nengah sebengkah penerang ditu kemari.

Nya alai, iya ngarap program nya deka ditampung belama sereta tau enda ibuh nganti musim sekula dibuka pun taun.

Ku iya, tu bedudi ari bisi raban apai indai suntuk belanja lebih agi sida ke mayuh anak dikena meli kereban dikena besekula.

“Insya Allah, kami deka neruska pengawa manah tu ukai semina maya semak jam sekula dibuka,” ku iya.

Ku iya, nengah program ke baka nya iya deka ngelempungka tating belanja apai indai tauka ruang bilik ke ngembuan mayuh anak nurun sekula.

 “Sukung ari bala bakih dalam parti enggau ketuai nengeri udah ngemuntang program nya dikereja enggau mujur,” ku iya.