KUCHING: Perintah nengeri ngagihka belanja sepenyampau RM2.3 juta ungkup projek rayat ngaga Balai Mayuh Guna, Begunan Baru Kuil enggau jalai ba Kuil Maha Mariamman, Batu Lintang ditu.
Pengawa nyuaka agih belanja udah dipenyadika Sapit Kepala Menteri Datuk Amar Douglas Uggah Embas ditu, kemari.
Sebedau tu, agih belanja ungkup projek nya dikemendar enggau dibantaika Kepala Menteri Datuk Patinggi Abang Johari Tun Openg kena 4 Julai 2018 rambau Pengerami Makai Lemai Pengasih Kuil Sri Maha Mariamman.
“Tu polisi perintah nengeri dikena nyaga pengelikun enggau pemerat begulai semua pengarap ba Sarawak.
“Berindik ari nya, pagi tu (kemari) kitai nyuaka chek ti udah dikemendar di baruh Projek Rayat ungkup kuil tu,” ku iya ba sebengkah penerang ditu, kemari.
Uggah ti mega Menteri Betanam Betupi Moden, Tanah Adat enggau Pemansang Kandang Menua nyemetah madah, nya kebuah Komiti Kuil patut nentuka agih belanja ti diberi dikena nitihka pematut.
“Kitai nengah Unit Pekara Pengarap Bukai (UNIFOR) deka matau projek tu nentuka iya dipejalai enggau mujur,” ku iya.
Kelimpah ari nya ku iya, ba projek ti udah dikemendarka ba taun 2017 enggau 2018, UNIFOR chakah bejalai gawa ngagai renggat baruh selampur Sarawak matau pejalai projek nya.
Berebak enggau nya ku iya, UNIFOR mega ransing gawa ngelala enggau ngenukuka peminta baru ti diterima taun tu sebedau dipasuk ke dalam Komiti Penyerenih Projek ngambika diperunding silik.
“Perintah mega ngansak rayat ngetankan ulah bebatak asur antara bansa, pemereti ati enggau bebasaka pangan diri ngambika kitai seruran ulih diau bebaik enggau likun sereta lantang.