Anda di sini

JHS dekaka kampung di nengeri tu diintu meruan datai ba taun 2022

Advertisement

KUCHING: Opis Kampung Sarawak (JHS) deka nentuka semua pengempu lisin kampung timpuh panjai nyapai setipikit ngintu kampung datai ba taun 2022.

Direktor JHS, Hamden Mohammad madahka penyapai tikas setipikit nya beguna amat ukai semina dikena nentuka kampung diintu meruan tang mega asil kayu batang ulih tama makit antarabansa.

“Ba semua pekara lisin kelebih agi timpuh panjai, sida dipinta ngulihka setipikit lalu sida patut pas ari proses audit ti dipejalai raban ketiga.

“Dikena ngulihka setipikit, tu ukai siti pekara muntang tang ba Sarawak, nyentuk diatu, kitai belapang dada laban enam sitak kampung ti mungkur lebih 561,000 hektar ngembuan setipikit Unit Gawa Ngintu Kampung (FMU),” ku iya.

Iya mansutka jaku nya rambau pengawa ngelancharka lambang ngintu 100 Taun Penumbuh JHS ditu, kilah ensana.

Ku Hamden, reti nya Sarawak ngeluarka produk sereta kayu ti diaku ba tikas antarabansa.

Iya madah kelimpah ari nya, 101,030.06 hektar pemesai ladang kampung ba Sarawak mega udah bulih setipikit.

Bejaku ngagai pengarang berita pengudah atur pengawa, taja pia, dikena nentuka kampung seruran diintu meruan ba nengeri tu, lebih setengah ari 468 lisin kereja batang udah dikinsil berenggat kenyau ari beberapa taun ke udah.

“Kitai ngena chara ngurangka penyampau kayu ditebang enggau siti ari nya, ngurang tauka nginsil lisin kereja batang ti bisi ba Sarawak.

“Baka ti dipadah aku, setengah ari (468 lisin) dikeluar, diatu semina tinggal 186 lisin kereja batang lalu pengawa nginsil udah dipejalai berenggat kenyau ari taun 2013 enggau 2014,” ku iya.

Advertisement