Anda di sini

Sarawak ulih nempa atlit muaythai tikas entarabansa

Advertisement
 Abang Johari ngangkatka jari Morris lebuh dipadu menggi gelar champion Pekit Muaythai Sarawak ungkup Mangkuk Kepala Menteri Sarawak, malam kemari.
ANAK SARAWAK: Abang Johari ngangkatka jari Morris lebuh dipadu menggi gelar champion Pekit Muaythai Sarawak ungkup Mangkuk Kepala Menteri Sarawak, malam kemari.

KUCHING: Sarawak bisi pengulih nempa atlit main muaythai ti ulih besemekih ba renggat nasional enggau entarabansa.

Kepala Menteri, Datuk Patinggi Abang Johari Tun Abang Openg madah, penyulut ti diayanka atlit muaythai nyengkaum menang midul emas ba renggat nasional nyata ngayanka Sarawak bisi atlit ti bepenau.

“Taja agi baru, Serakup Muaythai Negeri Sarawak (PMNS) mujur menang midul emas ba Lumba Malaysia  (SUKMA) Sarawak enggau suah menang ba renggat entarabansa.

“Tabi puji ngagai serakup tu laban mujur ngangkatka nama muaythai lalu nempa iya nyadi siti pekit beguna amat ba lumba Sarawak,” ku iya.

Iya mansutka jaku nya lebuh bejaku bejadi enggau pengawa nyuaka perais Pekit Muaythai Sarawak “Piala Ketua Menteri Sarawak” di Tebing Sungai Kuching ditu, kemari. Bela datai Datuk Bandar Dewan Bandaraya Kuching Utara (DBKU), Datuk Abang Abdul Wahap Abang Julai enggau Presiden PMNS, Jumaat Ibrahim

Abang Johari madahka Perintah Sarawak deka seruran mantu ngangkatka penyulut pengawa lumba nengeri tu.

“Aku mega setujuka peminta ari Datuk Abdul Karim Rahman Hamzah (Menteri Dagang Temuai, Seni, Main Asal, Nembiak enggau Lumba) ti deka ngemerambaika agi kampung lumba di Petra Jaya.

“Kampung lumba tu deka dikemansangka kitai besepiak enggau stadium nengeri. Tu deka disikap ngena bemacham perengka guna ti diguna nyengkaum perengka guna latih enggau mega lumba ti bekaul enggau Sarawak, ngambi ngelatih atlit ba renggat SUKMA enggau antarabansa,” ku iya nerang.  

Iya ngarapka pekit muaythai deka ngangkatka agi standard main lalu meri pemereti ti meruan ba pengawa ngemansangka lumba kitai.

Ba lansa bukai, Jumaat madahka raban sida udah bebendar gawa nentuka muaythai ukai semina nempa pemujur ba Sarawak aja tang mega Malaysia.

Taja pia ku iya, serakup tu mega begunaka sukung perintah nengeri nentuka muaythai Sarawak terus maju sereta dikelala serata dunya.

“Ari muaythai tu dikearap atlit kitai tentu deka ngemegahka Sarawak ba mata dunya,” ku iya.

 Berebak enggau nya, Abang Johari nyuaka perais champion Muaythai Sarawak ungkup Mangkuk Kepala Menteri Sarawak ngagai Morris Hii ari Kelab Muaythai Miri D30.

Advertisement