KUCHING: Ketuai Nembiak Parti Rakyat Sarawak (PRS) Datuk Snowdan Lawan bebendar bekimpinka Gabungan Parti Sarawak (GPS) ti baru direjista.
Nitih ku iya, bisi pematut ngingatkan rayat kelebih agi peranak menua pesisir ke alai GPS iya nya entiti enggau entukar politik baru ngagai ex-bala kaban Barisan Nasional (BN) Sarawak.
Taja GPS ditumbuh beberapa minggu pengudah Pengawa Bepilih Parlimen 9 Mei 2018, tang bala kaban GPS semina ulih berengkah bekimpin enggau terang pengudah dikemendar rejista ari Opis Pengerejister Gerempung (ROS) dalam bulan nyin tadi.
Bala kaban ari gempung GPS iya nya datai ari tulang belakang iya, Parti Pesaka Bumiputera Berstau (PBB) sereta mega Parti Sa’ati Rayat Sarawak (SUPP), Parti Demokratik Progresif (PDP) enggau PRS.
“GPS endang parti tulin menua tu ti mai rambai jaku ‘Sarawakians for Sarawakians’,” ku iya.
Ba jaku dipansutka iya rambau Pengerami Mandar Krismas Serakup Tuai Rumah Sitak Balai Ringin, Simunjan enggau Pantu (tauka Basimpan) di Kampung Ensebang, Balai Ringin kena Hari Lima tu tadi, Menteri Muda Lumba enggau Nembiak ngingatka rayat ke alai GPS dikena ari lambang Burung Kenyalang.
Tu ngingatka rayat ke alai BN Sarawak nadai agi ulih dikearap lalu GPS deka nguingka perau diri, ku Snowdan nambah.
Lalu penadai tuai politik ari Semenanjung ti mejal bala ketuai peranak Sarawak, GPS bisi awak besai bejakuka penemu sida enggau nadai penanggi maya minta mayuh agi royalti minyak enggau gis, mayuh agi pemansang ba kandang menua pesisir sereta mulaika baru isi enggau semengat ari Sempekat Malaysia 1963 ti udah lenyau ngelama tu di baruh pegai BN, ku iya.
Snowdan mega dekaka Basimpan bejalaika pangku pengawa meruan agi nyadi jematan, mata enggau pending ba atur pengawa besai nengeri nyadi kereban ngempung rayat renggat baruh enggau ngatur pekara komuniti memanah nyengkaum pekara tanah hak Adat Bansa Asal (NCR), Pemakai Menua enggau Pulau Galau.
Rambau atur pengerami nya, Snowdan bisi nyuaka insentif ngagai nembiak nyulut ba peresa UPSR tu tadi sereta mega belanja Projek Mit Pemansang Menua Pesisir (MRP) ngagai beberapa Komiti Pemansang Enggau Pengelikun Genturung Pendiau (JKKK).
Sama bisi datai begempuru mantar Krismas iya nya MP Sri Aman Masir Kujat sereta mega bala ketuai komuniti sereta bala bukai.