Anda di sini

Sarawak benung mansik model nanam baru kampung

Advertisement
 Abang Johari (lima kiba) bejadika Begunan Korporat M.M Golden (M) Sdn Bhd. Sama bisi dipeda iya nya Huang (empat kiba), Dr Anuar (lima kanan), Tiong (empat kanan), Lau (tiga kanan) sereta temuai ke bukai.
BEJADI: Abang Johari (lima kiba) bejadika Begunan Korporat M.M Golden (M) Sdn Bhd. Sama bisi dipeda iya nya Huang (empat kiba), Dr Anuar (lima kanan), Tiong (empat kanan), Lau (tiga kanan) sereta temuai ke bukai.

SIBU: Sarawak benung mansik model nanam baru kampung (penanaman semula hutan) ti dikena di Finland ungkup pengawa ngatur kampung enggau tegap di nengeri tu.

Kepala Menteri Datuk Patinggi Abang Johari Tun Openg madah, nyapai pemujur nya endang beguna dikena ngangkatka makit bekaul industri kayu nengeri ke mega siruka rampa menua.

“Kami benung mansik model di Finland, menua ti pemadu manah dalam pengawa nanam baru kampung tang gaya ari enda meri pengelebih ungkup industri kayu di menua tu.

“Nya ngambi timpuh urung 70 taun ungkup kayu nya tuai enti dibanding enggau ditu ti urung enam taun lalu ditebang.

“Reti nya, nama ti digaga diatu nanam baru. Aku udah madah ngagai Opis Kampung ngambika tetiap pun kayu ke ditebang patut ditanam baru ngambika enda puntan.

“Nentuka kayu semampai bisi endang beguna, nya alai pun kayu ti ditebang mesti ditanam baru ngambika bisi tumbuh baru.

“Nengah tu lalu meri kelai ngagai makit iya nya kitai endang ngemeratka rampa menua,” ku iya nerang lebuh ti bejadi Begunan Korporat M.M Golden (M) Sdn Bhd di /jalai Deshon ditu kemari.

Abang Johari mega sama meri jamin deka neruska polisi ex-Kepala Menteri Niang Pehin Sri Tan Sri Adenan Satem (Tok Nan) ti enggaika bisi kebun sawit bedandang besai di tanah perintah tang ngemendarka pengawa nya di tanah adat bansa asal (NCR).

“Kereja patut ngemayuhka polisi kebun dandang besai laban enda ulih ngarapka sawit aja.

“Nyema rega minyak sawit nurun lalu rega kayu niki, paling enda kitai ulih nyemelaka baka ni kitai ngena pemisi kitai,” ku iya.

Bekunsi pasal polisi ekonomi perintah nengeri Gabungan Parti Sarawak (GPS), Abang Johari madahka perintah nengeri endang meransang ekonomi nengah peluang ti kreatif enggau inovatif ke patut ditumbuhka ungkup komuniti dagang nya.

“Dikena ngerembaika ekonomi, kitai mesti bisi belanja ti deka meransang peluang dagang lalu ba masa ti sama, sektor peribit ngembuan pemisi bejalaika projek, perintah ti nyadi penatai pemisi deka narit mimit sereta nejuka sektor peribit neruska nya,” ku iya.

Abang Johari nyemetak madahka Sarawak benung ngeluarka minyak lalu perintah nengeri deka ngenaka chukai dagang ngagai petroleum enggau profuk petroleum ti deka meri penatai pemisi tambah ngagai nengeri.

“Lalu nengeri deka ngena asil nya ungkup belanja dikena mayar produk strategi kitai. Tu deka meri peluang ngagai sektor peribit bejalaika projek nya.

“Nya alai aku mutuska nengah hak kitai dalam Sempekat Malaysia (MA63) ngambi dikena ka chukai dagang ngagai petroleum ti nyadi menua ngeluarka minyak.

“Nya mih Bajet Sarawak 2019 asil semua nya RM10.5 bilion enggau agih belanja RM11 bilion iya nya bajet ke besai naka ke diatu ari perintah nengeri,” ku iya.

Bekaul kompeni M.M Golden (M) Sdn Bhd, Abang Johari madahka kompeni nya sebuah kompeni di menua tu ti udah mujur ngerembaika dagang ke menua luar.

“Nya alai, dikena meri pengandal ke orang menua luar ngagai pengulih rayat Sarawak dikena ngemansangka nengeri tu.

“Saritu kelai pemujur ngagai M.M Golden (M) Sdn Bhd ti bepun enggau opis lot kedai empat ringkat 7,200 kaki persegi ngagai begunan korporat baru 10 unit tiga ringkat enggau pemesai 40,000 kaki persegi,” ku iya.

Sama bisi datai iya nya Menija Pengatur M.M Golden (M) Sdn Bhd Dato Sri Huang Tiong Sii, Menteri Muda Pelajar enggau Pemansik Teknologi Dr Annuar Rapaee, Kaban Kunsil Nengeri (ADUN) Dudong Datuk Tiong Thai King, Residen Sibu Charles Siaw enggau Temenggung Datuk Vincent Lau Lee Ming.

Advertisement