KUCHING: Perambu nikika elawin tasah ungkup raban Opis Bomba enggau Penyah Penusah Malaysia (JBPM) meri empas positif sereta siti ari basa perintah enggau rayat ngagai raban Bomba.
Direktor JBPM Sarawak, Khirudin Drahman madahka perambu nya endang lama udah dianti semua pegawai enggau raban bomba ba serata menua.
“Tu deka meri empas postif ngagai raban JBPM ke alai nya siti kelai basa perintah enggau rayat ngagai pengawa ke udah digaga.
“Nya enda ngira jalai pengarap, politik, bansa, ideologi enggau ke bukai...tu baka ke ulih dipeda kitai ba surat kabar, media massa, media elektronik enggau digital,” ku iya madah ngagai Utusan Borneo, kemari.
Khirudin meri penerang nya lebuh ditanya penemu iya bekaul enggau perambu Opis Menteri Pengawa Berumah enggau Kaunsil kandang Menua (KPKT) ke deka nikika elawin tasah ungkup rabanJBPM.
“Meretika enam etika, misi sereta visi JPBM chukup ungkup manifestasi kami raban bomba dalam pengawa meri servis ngelui ari nama ke dikearapka rayat,” ku iya.
Bepelasarka berita Bernama, apin lama, KPKT deka merambu nikika elawin tasah ungkup anggota JBPM ngambika lebih senipak enggau pemar ti ditapi anggota maya bejalaikaa pengawa.
Menteri iya, Zuraida Kamarudin madahka piak iya deka berandau enggau Jabatan Perkhidmatan Awam nya bakani chara meri elawin tasah ungkup anggota JBPM.
“Udah datai maya ke patut endur kitai berundingka pengawa nikika (elawin tasah) laban kereja bomba tu berbahaya sereta kereja ukai dalam skop sida pan dikereja,” ku iya bejaku enggau raban pengarang berita di Johor Bahru.
Ba bulan Julai taun tu tadi, Zuraida madahka KPKT ngagihka sepenyampau RM35 juta dikena meri elawin tasah ngagai anggota JBPM, ti meri penguntung tauka pengelantang ngagai urung 13,000 kaban JBPM serata menua.