BINTULU: Institut Pengelikun enggau Pengerai Pengereja Pengawa Menua (NIOSH) komited deka mantu ngangkatka tikas pengelikun enggau pengerai orang gawa (KKP) di menua tu nengah kerejasama enggau organisasyen ti bisi di menua tu enggau menua luar.
Chairman NIOSH Tan Sri Lee Lam Thye madah, kerejasama nya deka mantu NIOSH nyapai juluk ti deka nyadi palan penyulut KKP ke udah tentu deka meri pemaik ngagai Sarawak.
“Tu nyadi sebagi ari pengawa NIOSH ti deka nyadi Palan Pemujur KKP, ukai semina di Malaysia tang mega di menua luar,” ku iya ba Pengerami Makai Lemai Meri Basa NIOSH Sarawak ditu kilah ensana.
Sama bisi datai Menija Kanan Opis Latih enggau Opis Kandang Menua NIOSH Saupi Nazri Mamat sereta Menija NIOSH Kandang Menua Sarawak Mohamad Anizan Mohammed Amin.
Lee madah, NIOSH deka nyain memorandum kerejasama (MoC) enggau Institut Pengelikun enggau Pengerai Pengereja Pengawa (IOSH) ti bepalan ba United Kingdon lebuh Baum Ninting Taun Organisasyen Pengelikun enggau Pengerai Pengereja Pengawa Asia Pasifik ke-33 (APOSHO 33) di Hong Kong bedau lama.
IOSH tu siti ari organisasyen ungkup profesional pengerai enggau pengelikun enggau lebih ari 47,000 kaban ari lebih 130 menua, ti nyadika nya organisasyen pengerai enggau pengelikun profesional ti pemadu besai di dunya.
“Nengah MoC nya, kededua raban nya udah besetuju nambahka profesionalisme ke tikas ti tinggi agi lalu bekunsika penerang enggau penemu bekaul pengawa KKP ti manah sereta isu ti bekaul nyengkaum bebadi daam pejalai sereta benung kereja di palan ti tinggi enggau palan ti mit.
“Kededua raban nya deka bekerejasama dalam mayuh program baka nambahka profesionalisme enggau tikas pemanah gawa staf, ngemansangka perengka ungkup program latih KKP di Malaysia enggau kandang menua ngelingi sereta neresa servis berunding,” ku iya.
Iya madah, kerejasama nya deka meri pemaik ngagai Sarawak laban NIOSH mega bisi mai pakar IOSH ngambika nyereta program NIOSH Sarawak baka seminar enggau baum.
Pia mega NIOSH enggau IOSH deka bekerejasama dalam bidang pemansik enggau teknologi penerang ti bekaul enggau KKP.
“MoC nya seriris enggau komitmen NIOSH dikena ngadaka tempat kereja ti likun enggau gerai di Malaysia nyengkaum di Sarawak,” ku iya.
Dikena nambahka agi standar KKP di Sarawak, iya madahka NIOSH Sarawak deka nyediaka servis buah runding dikena mantu industri nyambut peminta tanggungpengawa sida ti udah ditetaoka ari baruh Akta Keselamatan dan Kesihatan Pekerjaan (OSHA) 1994 dan Akta Kilang dan Jentera 1967 berengkah ari taun ti deka datai.
Iya madah NIOSH Sarawak deka bepindah ke indu opis di Pusat Latihan Teknologi Tinggi (ADTEC) Bintulu paling laun kena bulan Mac taun 2019.