SIBU: Kaban Kunsil Nengeri (ADUN) Bukit Assek, Irene Chang nyadaka pengirau ati bekaul enggau penambah sereta pengerekai igi penyakit rabies ba nengeri tu.
Irene nengah penerang media iya ensana bisi nanya naka ni pemayuh pemati ketegal penyakit nya baru iya ulih diputar.
Iya madah maya aum pemberita Kunsil Nengeri (DUN) sebedau tu, iya bisi mansutka pengirau ati bekaul enggau pengerekai penyakit nya ba Sarawak.
Kenu ku iya ari empat nengeri di Malaysia ke dipangka penyakit rabies kenyau beberapa taun ke udah, semina Sarawak aja bisi kes pemati.
“Pemadu ngenyinu, penyampau pemati diatu udah manggai 15 iku. Dalam enggau luar dewan, aku udah mantaika isu tu seraya ngangkaika pengasi atur ke digaga perintah nengeri dalam mutarka isu tu,” ku iya.
Kenu ku Irene, taja operasyen meri vaksin ngagai anjing dipeda bebendar tang atur nya agi tinggal ba belakang.
Iya madah perintah nengeri patut belajar ari Kedah, Perlis enggau Pulau Piang laban nengeri tu mega bisi kena kerekai rabies ba bulan Julai 2015.
Ketetiga nengeri tu semina ngambi awak tiga bulan mutarka isu nya kelimpah nadai kes orang bebadi nyawa.
Ku iya, taja pemesai Sarawak lebih ari ketetiga nengeri tu, tang igi penyakit iya bepung ngerekai ari pelilih ke pelilih.
“Perintah nengeri patut lebih fokus ngagai genap pelilih udah nya semua ukui lelang meseti dikurang tauka diperesa,’ ku tandu iya.
Iya madah, nyema ukui nya ditemu udah kena rampit maya iya dikurung, ukui nya meseti dilesap, lalu nyema iya enda gerao, iya meseti dituchuk vaksin sereta dilepas ngagai palan ngibun jelu.
Kenu ku iyam perintah nengeri mega patut bekerejasama enggau Gerempung Ukai Perintah (NGO) dalam numbuhka palan ngintu jelu.
Tandu Irene, nengah mina ngembuan dua raban penyaga rabies ungkup nyaga selampur menua Sibu, Selangau enggau Kanowit nya endang pengawa ke tusah deka dikereja.
Nya alai, iya meransang peranak nengeri tu besaup mutar penanggul rabies.
Taja sekeda tangkan udah dipansut tang agi bisi sekeda mensia mayuh ngelepas enggau ngelakka ukui sida bekedayau ngapa.
Ku iya, mensia mauh patut dipadah yaja ukui sida udah diberi vaksin, tang sida agi enda dikemendar ngelepaska ukui laban nadai jamin 100 peratus sida (ukui) beresi ari rabies.
Iya madah ukui ke dipelaba nyangka nadai mandangka kelai laban nyangka ngambi awak enam ngagai 10 bulan sebedau kelai nya ayan.
“Pia mega, ungkup mayau orang ke menggi patut ngambi awak lengkas bejejaga enggau chara nganjung ukui sida ngambi dituchuk vaksin,” ku iya.