KUCHING: Raban nembiak ba nengeri tu diperansang terus nyukung sereta pechayaka perintah Gabungan Parti Sarawak (GPS), awakka pekara ke dikemerat rayat ti mungkur raban nembiak terus dikemerat enggau dijaga.
Kaban Kunsil Nengeri (ADUN) Demak Laut, Dr Hazland Abang Hipni madah, perintah nengeri kenyau ari dulu suba bebendar ngangkatka raban nembiak enda ngira bidang nyengkaum ba lumba enggau main, kereja enggau aktiviti rama.
Ba Bajet 2019 Sarawak ku iya, Kepala Menteri Datuk Patinggi Abang Johari Tun Openg ngagihka 76 peratus ari semua belanja ke tuju pemansang.
“Agih belanja ti besai nya muka awak lalu ulih nyendiaka kereja ngagai raban nembiak, senipak enggau juluk raban nembiak kemaya hari tu ti begunaka kereja,” ku iya.
Iya mansutka penemu nya lebuh bejaku ba pengerami nutup pekit sepak takraw 2018 ti diatur Unit SABERKAS Tabuan Foocow enggau SABERKAS Demak Laut ditu, apin lama.
Ngenang pasal pekit nya, Dr Hazland madahka aktiviti lumba enggau main sepak takraw ke diatur SABERKAS Kampung Tabuna Hj Drahman 2 deka nyadi aktiviti ninting taun, beduduk ari bisi nerima sukung ti manah.
“Meri puji ngagai pengatur ti udah mujur ngatur pekit main sepak takraw lalu tu keterubah iya. Baka ke dipadahka ngagai aku pesereta ke diterima chukup meri peransang.
“Nya alai, aku setuju sereta temegah ati madahka main sepak takraw tu deka nyadi pekit ninting taun SABERKAS,” ku iya seraya ngarapka pekit nya nerima sambut ti manah ari peranak endur nya nyengkaum dibuka ngagai raban nembiak DUN Demak Laut.
Ba pekit nya, bisi 9 tim nyereta kategori junior enggau 12 tim masuk kategori tebuka.
Kategori tebuka, tim Katafoo D nyadi champion ti mai pulai perais mata duit, trofi enggau ‘trofi iringan’.
Lalu kategori junior, tim Miri nyadi champion ti sama mai pulai perais mata duit, trofi enggau ‘trofi iringan’.
Pemain ti pemadu manah kededua kategori nya mai pulai perais hamper iya nya kategori tebuka Mohd Shazwan Osman enggau alif Aiman Hospi enggau Haeril ungkup kategori junior.
Kelimpah ari nya, pekit ‘menimang’ bol takraw bisi diatur ungkup kategori junior ke alai Alif Aiman Hospi nyadi champion ti mai pulai sebuah piala.