SIBU: Seraban pekebun mit kelapa sawit ari zon tengah ditu besebana ngagai Opis Menteri Industri Besai awakka mantu mutar rega komoditi ke balat nurun lalu ngirauka ati.
Nengah pengari rayat Parti Keadilan Rakyat (PKR) enggau pengari Parti Tindakan Demokratik (DAP), siti pengawa randau udah dibatur begulai enggau pengari Kaunsil Minyak Sawit Malaysia dalam ngiga sekeda atur enggau dikena mutar rega sawit ke balat nurun.
Kenu ku pengatur randau George Chen, piak sida nerima mayuh peminta ari pekebun mit ti ngujungka pengawa randau nya diatur.
“Bisi sekeda perambu enggau jalai mutar ditemu dikena mutar penanggul nya,’ ku iya madah ngagai pemberita pengudah tembu randau ditu, ensana.
Entara pekara bisi dilansa iya nya isu meri Setipikit Kelapa Sawit Lestari Malaysia (MSPO), Chara Betanam Betupi ti Betuk enggau chara ngulihka Tikas Pengeluar Minyak ke lebih tinggi (OER), ngemuntangka pengawa ngambi pengereja pengawa luar, skim MPOB, lisin enggau ngaga kilang kelapa sawit mit ungkup palan ke semak, mutarka isu logistik enggau perengka pengangkut, meri chukai pechuma ngagai chukai jual enggau servis (SST), isu udah ngena bio-diesel enggau ngaga mayuh agi jalai.
Berebak enggau nya, Kaban Kunsil Nengeri (ADUN) Pelawan David Wong minta bala pekebun mit ditumbun ba sebuah gerempung dikena ngarika semua pekebun swasta numbuhka sebuah gerempung ngarika semua pekebun mit ba serata nengeri.
“Sehari tu, kaban kitai nadai ngembuan gerempung ngujungka sebana kitai enda kering didinga. Aku ngarap bala pekebun mit tu di Sibu tauka sitak besemak ulih numbuhka gerempung dikena ngenegapka agi sada nyawa kitai,” ku iya.
Udah nya, ADUN Bukit Assek Irene Chang madah pemar enggau penanggul ditapi pekebun mit tu end aulih diputar enggau lengkas.
“Taja pia, bala piak bekaul deka nentuka semua penanggul ti dikemansang kelapa sawit mit enggau deka datai ba jari menteri bekaul,” ku iya.