KUCHING: Unit Hal Ehwal Agama-Agama Lain (UNIFOR) deka terus matau projek rumah sembiang ti nerima bantu dikena nentuka projek nya terus dipejalai.
Sapit Kepala Menteri ti mega menteri ke megai tanggungpengawa nyaga Unifor, Datuk Amar Douglas Uggah Embas madahka, nya dikena nentuka objektif perintah mantu ngemanah enggau nyeruri rumah sembiang ulih nyadi nyata.
“Kitai deka matau enggau suah semua pengawa ngaga projek ke dipejalaika tu.
“Iya amat beguna dipatau dikena nentuka objektif kitai ngemanah enggau nyeruri rumah sembiang di Sarawak mujur kelimpah mantu sida ba renggat baruh,” ku iya lebuh bejaku ba Majlis Penyerahan bagi Rumah Ibadat Fasa Ketiga 2018 ba opis iya di Wisma Bapa Malaysia ditu, kemari.
Ba pengerami nya Uggah nyuaka sepenyampau RM560,000 agih belanja ungkup lima projek ngaga rumah sembiang ti mungkur tiga sitak Kunsil Nengeri (DUN) iya nya Nangka, Mulu enggau Tanjung Datu.
Bejaku baru Uggah madahka lima projek ba tiga sitak nya udah dikemendarka dibaruh fasa ketiga bantu ngaga enggau nyeruri rumah sembiang ba taun 2018.
“Ba DUN Nangka, sepenyampau RM100,000 diungkapka dikena bejalaika projek ngaga Kuil Hindu ba Sibu, lalu dua projek di Mulu iya nya ngaga rumah gereja enggau taska baru BEM Kampung Malinau (Mulu) enggau projek nyeruri enggau ngemanahka gereja BEM ba Kampung Long Selaan, Ulu Baram enggau penyampau agi belanja RM160,000.
“Lalu dua projek ba DUN Tanjung Datu iya nya ngemanah enggau nyeruri Gereja St Stephen ba Kampung Rayu Iban, Lundu enggau ngubah sereta ngemanahka rumah palana Penginjilan Methodist Lundu enggau penyampau semua RM300,000,” ku iya.
Uggah madahka, lima projek nya sebagi ari 231 projek ti dikemendarka dibaruh agih belanja RM20 juta ari perintah nengeri taun tu, ti meri penguntung ngagai institusyen pekara jalai pengarap bansa bukai.
Iya madahka taun 2017, perintah nengeri udah ngagihka RM15 juta dikena bejalaika 77 projek rumah sembiang serata Sarawak.
“Lalu ungkup taun baru 2019, perintah nengeri udah ngemendarka RM30 juta diagih dikena terus mantu ngaga enggau nyeruri rumah sembiang.
“Taun baru agih belanja bisi ditambahka RM10 juta dibandingka enggau taun tu. Nengah agih belanja tu, ulih mantu ngenyampatka pengawa ngaga enggau nyeruri rumah seminang.
“Taja pia lis projek bedau ditemu bagi,” ku iya.
Majlis nyuaka agih belanja nya disuaka Uggah ngagai ADUN Tanjung Datu Datuk Amar Jamilah Anu enggau ADUN Mulu Datuk Gerawat Gala sereta ADUN Nangka Dr Annuar Rapa’ee diarika Pegawai Tadbir Khas iya, Suhaili Mohamed.