LAWAS: Ejensi Pemansang Kandang Menua Utara (NRDA) ti nyengkaum sitak Limbang enggau Lawas deka ngepunka 90 program sereta projek ti ulih mai pemansang ke beungkus RM1.5 bilion ba taun 2019 nyentuk 2021, lalu ngarapka tu ulih nyungkak pengerembai sosioekonomi di kandang utara nengeri tu.
Projek infrastruktur enggau perengkaguna mensia mayuh ti beungkus RM1.23 bilion deka nyadi pemungkal agenda pemansang ti dijuluk NRDA lalu betuaika Sapit Kepala Menteri Datuk Amar Awang Tengah Ali Hassan.
Projek tu ila deka disikap enggau pemansang dalam sektor betanam betupi enggau pengawa berikan ke beungkus RM8.36 juta, pemansang dalam sektor industri sereta Industri Mit enggau Jelan Pemesai (PKS) ti beungkus RM18 juta, dagang temuai, rama, raban nembiak enggau main asal (RM81.7 juta) sereta latih teknikal enggau pelajar (RM160 juta).
Tu siti ari singkang ti manah ari Perintah Nengeri dalam pengawa ngerembaika penyulut Koridor Kuasa Ulih Dikena Baru Sarawak (SCORE) enggau mekuh dalam pengawa ngemansang sereta ngena enggau naka ulih potensyial di kandang Sarawak utara.
Awang tengah madah munyi nya lebuh ti bejaku dalam seminar khas NRDA ungkup urung 350 iku ketuai komuniti, pengari Gerempung Ukai Dikuasa Perintah (NGO) enggau raban ti bisi pemerat ke bukai ari bagi menua Limbang enggau Lawas, ti bepalan ba Hotel Seri Malaysia ditu, kilah ensana.
“NRDA ke baru ditumbuh ke 15 March taun tu, iya nya siti ejensi pemansang ti ketiga pengudah Ejensi Pemansang Ulu Rajang (URDA) enggau Ejensi Pemansang Tanah Tinggi (HDA) ari baruh Kaunsil Pemansang Koridor Kandang Menua (RECODA), ke udah tentu deka ngelengkaska pemansang SCORE,” ku iya.
Awang Tengah ke mega Menteri Pemansang Mengeri enggau Pengeraja Asal Kedua lalu Menteri Pemansang Industri enggau Pengawa Dagang madahka NRDA mega nyadi penembu pemansang kandang menua ari baruh HDA ti enda ulih dikemansang kediri.
“SCORE keterubah iya nya nyengkaum urung 70,000 kilometer persegi lalu Kepala Menteri kitai ke lalu mutuska deka ngemesai ngagai URDA, HDA sereta NRDA dikena mai kandang menua nya ti pemesai lebih 100,000 kilometer persegi ungkup meri fokus ke besai agi dalam ngelangkar sereta ngemansang kandang menua kediri empu enggau penyelai sereta potensyial pemansang nya kediri,” ku iya nambah.
Awang Tengah madah, ngemesaika kandang menua ti dikemerat sereta sekeda kandang menua nya, tu buah runding ari kepala menteri ke deka ngemesai pemujur bungkur SCORE ti udah narit penanam puku menua luar enggau ari menua tu empu beungkus RM33 bilion di Taman Perindustrian Samalaju (SIP) naka ke diatu, enda nyengkaum RM23 bilion projek ngaga besi enggau metanol ti dikemendar, lalu diatu ba tikas benung dipansik.
Iya madahka SCORE iya nya entara koridor pemansang ti endang mujur sereta besai di menua tu, ke udah matak industri kuasa intensif ari menua luarlalu terus nyadi ‘pematak’ penanam puku ungkup nengeri tu.
“Nya ngembuan enam industri ti besai lalu saritu, SIP ngasilka gaji bulan sepenyampau RM484 juta ti dipasukka ke dalam ekonomi menua tu enggau kandang endur ngelingi di nengeri tu.
“Lalu RECODA ti ngemata tigaejensi pemansang tu deka dikemansang dalam struktur organisasyen nya, dikena matau program enggau projek ke benung dipejalai,” ku iya nambah.
Komiti tinda ungkup NRDA udah ditumbuh enggau RECODA ti ngelangkar, matau tauka bejalaika projek deka mandangka mayuh agi orang ti dichiri dikena nampung peminta ari ketetiga ejensi pemansang nya lalu tinda dijangka deka dibuka ba suku keterubah 2019.
Ngenang enggau silik paal pekara nya, Awang Tengah madah semua tiga ejensi pemansang ari baruh RECODA udah diagihka RM1.5 bilion tiap siti lalu dibelanja dalam timpuh dua taun sereta ngelui bajet biasa ari baruh Atur Pemansang Malaysia Lumpar Ke-11.
Beserimbai enggau nya, iya dekaka semua enam ejensi kunterik sereta ejensi ti bejalaika pengawa nya enggau mensia mayuh deka bekerejasama dikena nentuka tikas pejalai projek nya nadai penanggul lalu ngepunka ejensi pemansang nya sereta lalu minta mayuh agi agih belanja ba renggat ti deka datai sepengudah 2019 ila.
Sama bisi datai ba licha nya komiti NRDA iya nya Kaban Parlimen Lawas Datuk Henry Sum Agong, Kaban Kunsil Nengeri (ADUN) Batu Danau Paulus Palu Gumbang enggau bala ke bukai.