MIRI: Semina ketegal bida politik antara ketuai raban bansa enggau sekeda nembiak redak ngujungka siku indai tunggal ngaga ripot polis laban madahka diri ‘dikemeli’ sereta dichiping.
Helen Kiyong, siku indai tunggal bansa Penan ti gawa ngatika diri, ari Rumah Peberi di Sungai Menok, Tinjar, madahka iya enda puas ati enggau ketuai raban bansa sida ti dipadahka nyiping iya lalu ulah bepilih bulu enggau sida ti enda sepenemu enggau iya (ba politik).
Ku iya, kaul majak lunggar antara iya enggau ketuai raban bansa nya, pengudah taba ti udah diserah ngagai peranak genturung pendiau endur ngentak ke rumah panjai dalam taun 2009, diambi ketuai raban bansa pulai baru lalu enda ngemendarka sida Helen sebilik ngentak rumah ba taba nya.
“Ba sempekat kami kena 12 Ogos 2009, iya nyerahka taba nya ngagai kami ngambika bisi alai ngentakka rumah panjai, nitihka bayar ti udah disetuju lalu rumah panjai baru berengkah digaga ari taun 2013.
“Ba taun 2017, lebuh datai ba timpuh aku deka ngentak rumah, nangkir rumah panjai ke udah bisi ba taba nya, ngenyit ketuai raban bansa kami berubah runding, ketegal aku nyukung Elia Bit (ex-chalun PKR ba N76 Marudi). Aku ngasaika dalih iya enda ulih diterima akal,” ku Helen.
Ngenang silik, Helen madahka pekara nya mega udah dibai ngagai renggat ketuai raban bansa enggau ketuai komuniti sida ngambi dikerandau lalu pemutus taba ti dipetalat nya dibagi dua, iya nya 20 kaki endur ngaga Rumah Indu genturung pendiau nya lalu 16 kaki agi diserah ngagai Helen, endur sida sebilik berumah.
Taja pia, pemutus ti bela dipendingka Penghulu Patrick Jelaman, ketuai komuniti sitak Tinjar lebuh nya, ditulak Ketuai Raban Bansa Peberi Magelit.
Asa ketegal ulah Peberi, Helen udah nya ngaga ripot polis di Opis Polis Besai Miri kena 10 Disember lalu mantaika sebana pasal isu sama ngagai Pemesai Pelilih Bakong sebedau tu.
“Aku nemu pemutus iya (ketuai raban bansa) ketegal enda puas ati bida penemu politik kami, laban aku nyukung PKR lalu mega meri sukung aku ngagai Roland Engan (chalun PKR ba penuduk Parlimen Baram maya Pengawa Bepilih Besai (PRU) tu tadi,” ku Helen nerang ngagai Utusan Borneo ditu, kemari.
Berindik ari nya iya deka ke raban bekuasa enggau bekaul mutarka pekara tu sereta nyaup mutarka isu bekaul laban iya deka berumah ke sida sebilik.
Berebak enggau nya, Peberi, ba surat nuju Pemesai Ngatur Pengawa Opis Pelilih Mit Tinjar (salin diberi Helen) madah kebuah iya deka ngetanka taba tanah ba ujung genturung pendiau nya laban deka ngentak rumah ungkup raban indai ba rumah panjai nya.
Pia mega ku Peberi, ba sebengkah aum ti diatur kena 13 Oktober, 2016, ngaul raban indai, sida setuju taba nya dikena ngentak ke Rumah Biro Indu ungkup peranak dia, sepenemu enda ngemendarka peranak genturung pendiau ngachau taba ti udah ditetap nya.