MIRI: Sarawak diatu bebendar agi nyendiaka produk dagang temuai ti tau meri empas enggau peneleba berega ngagai bala temuai ti datai ke nengeri tu.
Menteri Muda Dagang Temuai, Seni enggau Main Asal Datuk Lee Kim Shin madah tu disedia nyerumba Kimpin Nemuai Ke Sarawak (VSY) taun baru.
“Bala temuai ukai semina datai deka meda rumah panjai aja tang sida tau diau dia lalu ngasaika peneleba ngidupka diri begulai enggau peranak dia,” ku iya rambau Malam Kaunsil Dagang Temuai Sarawak (STB) Begulai enggau Media ba sebuah hotel tebilang ditu, kilah ensana.
Ku iya, bala temuai ti diau begulai ba rumah panjai deka nyepi pemakai, ngasaika budaya, bejalai ninjau rampa menua asal sereta ngintu hari besai menua tu.
“Sarawak nagit penatai lima juta temuai ngagai nengeri tu dalam taun 2019 lalu kitai tentu mega deka nyendiaka pakej ti deka matak sida kitu,” ku iya.
Kimpin Nemuai Ke Sarawak taun baru ku iya deka meda STB nyelinting pengawa ngagai ‘dagang temuai ti bisi tanggungpengawa’.
“Bala temuai diatu rindu agi diau lama agi ba sekeda endur laban sida deka belajarka budaya, gaya idup, pemakai sereta pengawa bukai.
Tentu mega tu kenang manis ti tau dikunsi begulai pengudah sida mulaika diri ngagai menua asal ila,” ku iya.
Lee matak perati ke alai penemuai ngena engsikal ba mengeri ti ngurangka karbon bala temuai mega majak dikerindu.
“STB bela deka bejalaika tanggungpengawa ngurang enggau ngena baru barang ti udah dibuai ba atur program sida nyengkaum ‘Festival Muzik Hutan Hujan Sedunia’.
“Ambika chunto, nempa barang promosyen lama nyadi kantung sandik tauka ngunah teda pemakai nyadi sum,” ku iya.
STB mantaika lambang Taun Nemuai Ke Sarawak (VSY) 2019 ba sebengkah pengawa industri di ba London, United Kingdom (UK) kena 6 November tu tadi.
Kimpin nya dipelaba deka ngangkatka Sarawak dalam kar dagang temuai nyadi siti ari palan dagang temuai ba Asia Tenggara.