Anda di sini

PKR Sarawak ngutuk penemu menteri Perintah Besai ti deka nyilih Undang-undang Tanah Nengeri

Advertisement
BONIFACE
BONIFACE

KUCHING: Parti Keadilan Rakyat (PKR) Sarawak deka bebendar ngutuk enti amat bisi menteri perintah besai dalam Perintah Pakatan Harapan (PH) meri langgur penemu ngambika perintah nengeri ngena Kanun Tanah Menua dikena nyilih Kanun Tanah Sarawak.

Mandal Chairman PKR Sarawak, Boniface Willy Tumek madahka langgur penemu baka nya enda ulih diterima laban bisi niat ngemunaska hak enggau kuasa Sarawak ba tanah diri.

“Kanun Tanah Menua iya nya undang-undang ti nyaga semua pekara tanah ba Semenanjung Malaysia lalu Kanun Tanah Sarawak iya nya undang-undang ti nyaga semua pekara tanah ba Sarawak.

“PKR Sarawak beratika pekara tu balat nyima ati lalu mar pechaya ke alai siku menteri ba Perintah PH berani meri langgur penemu baka nya dikena munaska Kanun Tanah Sarawak ti nyadi siti kelai autonomi Sarawak ba ti bisi dalam Sempekat Malaysia 1963 (MA63),” ku iya ba penerang berita, kemari.

Boniface ti mega ketuai Pampang PKR Mas Gading nambah, siku menteri ba Perintah PH patut nemu sentimen rayat Sarawak bekaul enggau MA63 enggau autonomi Sarawak.

Nya alai ku iya, sebarang pekara ti mandangka hak sida deka lenyau ti deka meri empas besai ngagai PH ba pengawa bepilih nengeri ti deka datai.

“Langgur penemu baka tu meseti ditulak. Pekara tu tau enda nyadi enti langgur penemu baka tu enda digaga semadi mih bala ketuai kanan ba Perintah PH berundingka nya,” ku iya madah nyemetak.

Berindik ari nya, Boniface minta Sapit Kepala Menteri, Datuk Amar Douglas Uggah Embas mantaika nama menteri ti meri langgur penemu nya lalu ngatur aum ngenyit ba Aum Kunsil Nengeri dikena ngutuk enggau nulak langgur penemu nya.

Uggah maya Program Pemesai Begulai Enggau Rayat ba Rh. Entinggan, Spaoh ensanus madahka langgur penemu ngambika Sarawak ngena Kanun Tanah Menua dikena nyilih Kanun Tanah Nengeri endang enda engkeman.

Iya madahka langgur penemu nya udah dibantaika siku menteri perintah besai ngagai iya, tang enda madahka nama menteri nya.

Advertisement