SIBU: Serakup Ex-Soldadu Tasik Diraja Malaysia (PBTLDM) Pampang Nengeri Sarawak dekaka perintah baru Pakatan Harapan (PH) muka agi runding ba pengawa meri awak ngagai bansa ukai Melayu bela megai tanggungpengawa ba pengawa soldadu.
Chairman PBTLDM Sarawak, Thomas Ling nyemetak madahka pengawa ngambi orang gawa dipejalai bepanggai ba pengelandik enggau penyulut pelajar lalu ukai nitihka Indeks Penyulut Pengawa (KPI) baka ti dipejalai perintah sebedau tu.
“Mayuh peranak menua tu patut diambi gawa ari sukut akademik kelebih agi bansa China tejanggal ketegal enda lepas KPI ti ditetap suba. Kitai ngarapka pekara tu badu agi nyadi maya ngambi gawa ti deka datai,” ku iya ba aum pengarang berita ba opis serakup, kemari.
Ari pengandal ngarap pengawa ngambi peranak Sarawak nyereta Soldadu Tasik iraja Malaysia (TLDM) ulih ditiki ngagai 25 peratus, Thomas madahka Perintah PH ngayanka diri nerima pengudah nyiri Senator Liew Chin Tong nyadi Sapit Menteri Ngetanka Menua.
“Tu nyata nganyanka perintah baru enda bemainka sentimen bansa. Ari ulah nerima baka tu, kitai ngarapka bansa China mega ngubah chara berunding ngambika bela begulai nyereta Raban Soldadu Malaysia (ATM).
“Ari pengawa nyirika Liew nyadi Sapit Menteri Ngetanka Menua deka meri peransang ngagai raban nembiak bansa China bela ngaul diri ba tim ATM,” ku iya nerang.
Dalam taun 2018 ku iya, timbal bansa China nyereta TLDM udah nambah dibida taun sebedau nya taja penyampau tubuh agi mimit amat iya nya kurang ari 10 iku.
Pia mega ku iya, PBTLDM bebendar gawa mantu ngambi orang gawa ngagai ATM, Universiti Pertahanan Nasional Malaysia (UPNM) enggau Maktab Tentera Darat (MTD) kenyau ari taun 2010 ukai semina ba Sarawak aja, tang mega ba Semenanjung Malaysia.
“Serakup deka seruran sedia sebarang maya mantu tetiap renggat ngambi orang gawa ba ATM, UPNM enggau MTD ti dipejalai ba Sarawak.
“Nya kebuah kitai meransang peranak Sarawak ngambi enda muai awak ti bisi,” ku iya.