MIRI: Tetiap 72 sitak kunsil nengeri ari baruh pegai Gabungan Parti Sarawak (GPS) deka bisi antara 130 ngagai 300 kunterik projek ti dipelanja perintah nengeri ke berega urung RM12 juta ninting taun, ti deka dilanchar dalam timpuh 2019-2021.
Menteri Muda Pemansang Dagang Mit enggau Jelan Pemesai (PKS) enggau Menteri Muda E-Dagang, Datuk Mohd Naroden Majais madah nadai kebuah kunteriktor ke berejista ba menua di nengeri tu enda ulih diberi kereja.
Perintah Nengeri udah ngagihka RM648 juta ninting taun ungkup Projek Mit Pemansang Menua Pesisir (MRP), Program Transformasyen Menua Pesisir (RTP) enggau nyeleti rumah ungkup tetiap 72 iku Kaban Kunsil Nengeri (ADUN) GPS ti bisi urung RM8 juta siku, lalu penyampau nya sebaka enggau Kaban Parlimen (MP) GPS.
“Bala ADUN GPS mega bisi diagihka RM1 juta siku dikena nyeleti rumah tauka ngintu baru ti ulih mungkur antara 66 ngagai 100 buah rumah,” ku iya.
Menteri muda nya mansutka jaku nya lebuh bejaku ba Simposium Orang Dagang Kunteriktor ti diatur ba Lawas kena Hari Enam tu tadi.
Naroden nyemetak madahka perintah nengeri udah ngemudahka makanisme pengawa ngelancharka projek enggau meri kuasa ngagai komiti tinda bagi menua sida empu ti diketuaika Residen ngambi ngemendarka pengawa meri projek dataika ‘rega siling’ sepenyampau RM2 juta seraya iya ti berega RM1 juta enggau baruh agi deka bepelasarka sistem ‘cast-lot’.
Rega siling istem cast-lot udah ditiki ari RM0.75 juta, lalu tu dibantai nengah antara 50 ngagai 150 projek pemansang setaun enggau agih belanja RM8.5 juta ari MRP enggau RTP.
Bisi urung 5779 kunteriktor Bumiputera ba nengeri tu, lalu Perintah Nengeri ngagihka RM2 biliun ungkup projek RTP ti datai ari infrastruktur pemun baka jalai alun, parit enggau nyeleti sekula ngagai pojek ngemanahka stadium mini enggau rumah pengarap.
Naroden minta raban kunteriktor ngambika enda milih chara ngiga duit enggau jampat enggau puntan ngerembaika serikat enggau penyikar sida gawa.
“Datai ba maya iya kita madah enggai ngagai ‘Alibaba’ tauka ‘Alimama’ ungkup komisen lima peratus tang bediri tegap ba kaki diri empu ngereja pengawa,” ku iya.
Kunteriktor mit ba semua pakej kereja endang enda diperansang taja bisi sekeda komponen baka kereja piling tau diberi kunterik mit ungkup projek pemansang.
Ku Menteri Muda nya, raban kunteriktor ti ditemu ngelanggar atur nya tau diengkah ba rintai chelum enggau ditagang ari ngemaru lisin pengelama tiga taun baka ti ditetapka kabinet nengeri enggau perintah besai.
“Tu ukai deka ngukum sida tang pulaika pemaik ngagai raban kunteriktor Bumiputera ngerembai baka ti nyemetak disebut Menteri Besai,” ku iya.
Naroden ngansak raban kunteriktor bisi disiplin ba pekara belanja ari matau penyampau enggau chek dikeluar sereta pintar runding ngulihka pemansut belanja baka overdraft dikena melanja projek sida.
Iya meri langgur penemu ngagai raban kunteriktor menua tu diberi pemerat ba kereja ti diberi ngagai pelilih menua ba nengeri tu.
Tu deka ngemunaska pekara enggaika kunterik tau dimenang orang luar, ti udah nya deka meri kunterik mit ti udah nya ngagai beberapa renggat mit ti ujung iya dikereja peranak menua tu.
Sapit Kepala Mengeri enggau Menteri Industri sereta Pemansang Pengawa Dagang Datuk Amar Awang Tengah Ali Hasan sama bisi ngulu kededua Entrepreneur Contractor Simposium Orang Dagang Kunteriktor ti diatur ba Lawas enggau Limbang ujung minggu tu tadi.