KUCHING: Sapit Kepala Menteri Tan Sri Datuk Amar Dr. James Jemut Masing (gambar) madah ulah enda ngamatka semaya tauka ‘nikal pulai’ udah nyadi pemai Perintah Pakatan Harapan (PH) ari baruh pegai Menteri Besai Tun Dr. Mahathir Mohamad.
“Bula ke semaya tauka ‘nikal pulai’ nyata udah nyadi pemai Perintah PH tauka Dr Mahathir. Rasional pemutus nya bisi ulih diterima.
“Ambika chunto, lebuh sida (Perintah PH) enda ngamatka semaya, Tun M (Dr. Mahathir) madahka semaya iya nya manifesto sida ukai bup injil. Nya kebuah, enda ngamatka semaya ba sida ukai penyalah tauka dusa,” ku iya nengah penerang kemari.
Masing ti mega Presiden Parti Rakyat Sarawak (PRS) nyebut baru jaku Dr. Mahathir ti madahka, “‘nikalka pulai’ ba pemutus kitai nya nadai ngawa laban kitai ukai malaikat, indah bala malaikat pan nemu silap. Lebuhka silap lalu kitai ngeleda, kitai deka nikal pulai, nadai salah ulah baka tu!”
Ku iya nambah, bulaka pekara ti udah disebut tauka dikereja udah nyadi ulah ti dikemeranka Dr. Mahathir.
“Siti ulah ti dikereja iya (Dr. Mahathir) iya nya lebuh ditanya sekalika iya udah ngemasukka Anwar (Datuk Seri Anwar Ibrahim) dalam jil tauka enda, saut iya, “Enda, kort ti ngemasukka Anwar dalam jil”.
“Ari pekara tu (Dr. Mahathir) endang betul. Baka ni kitai deka nyakal penemu Tun M?
“Kebuah pia, enti sukur pengamat, iya (Dr. Mahathir) betul tang isi semua isu udah dipusinka iya ngena pemintar iya bejaku,” ku iya.