Anda di sini

Bas elekterik CRRC Sarawak keterubah dipenyadi kemari

Advertisement
 Masing (kiba) disempulang (dua kiba) Menteri Muda Nembiak enggau Lumba enggau Main Datuk Snowdan Lawan sereta ke bukai ngayanka kelai jari manah lebuh bejadika produk ‘CRRC Electric City Bus’ keterubah Sarawak, kemari. — Gambar Tan Song Wei
MANAH: Masing (kiba) disempulang (dua kiba) Menteri Muda Nembiak enggau Lumba enggau Main Datuk Snowdan Lawan sereta ke bukai ngayanka kelai jari manah lebuh bejadika produk ‘CRRC Electric City Bus’ keterubah Sarawak, kemari. — Gambar Tan Song Wei

KUCHING: Kepala Menteri Datuk Patinggi Abang Johari Tun Openg meri langgur penemu ngagai Opis Menteri Dagang Temuai, Seni, Main Asal, Nembiak enggau Lumba enggau Main ngambika berunding enggau kompeni bas elektrik ba pengawa ngelakuka eko-dagang temuai nengeri tu.

Iya madahka nya berindik ari projek pemungkal bas elekterik keterubah Sarawak, iya nya ‘CRRC Electric City Bus’ deka beoperasyen di mengeri Kuching berengkah pun taun baru.

Bepelasarka pekara ti dipadahka ngagai iya, projek pemungkal bas nya deka nyendiaka servis nadai bebayar ngagai semua peranak menua enggau temuai dalam timpuh bulan tang dipelanja kompeni peribit.

“Senipak enggau Taun Nemuai Sarawak 2019, Opis Menteri Dagang Temuai, Seni, Main Asal, Nembiak enggau Lumba enggau Main engka tau beratika penyauh sida ulih bekerejasama enggau CRRC ba pengawa ngerembaika servis bas nadai bebayar sepemanjai taun nemuai  ke nengeri tu.

“Tu peluang tauka publisiti ti manah ngagai sarawak sereta industri dagang temuai ba pengawa ngelakuka Sarawak nyadi palan eko-dagang temuai ti tegap,” ku iya.

Abang Johari mansutka penemu nya dalam teks jaku iya ti dibacha Sapit Kepala Menteri ti mega Menteri Pemansang infrastruktur enggau Perengka Pengangkut Tan Sri Datuk Amar James Jemut Masing, ti ngarika iya bejadika produk ‘Sarawak 1st CRRC Electric City Bus’ ke diatur ba BCCK ditu, kemari.

Prototaip bas nya ke nyadi produk projek pemungkal kerejasama entara kompeni menua tu HENZ Pacific Sdn Bhd enggau kompeni ari menua China, Zhejiang CRRC electric Vehicle Co., Ltd.

Ngenang pasal bas elektrik CRRC nya, nitih sereta ngemeranka konsep teknologi ngaga CRRC High-Speed Train kelimpah ari beratka pemeresi rampa menua, ai enggau angin nyengkaum maya bas nya bejalai enda inggar.

Ku Abang Johari, sistem perengka pengangkut mensia mayuh di nengeri tu diperambu enggau manah iya nya gempung ari MRT, LRT, Monorail, BRT, Stage & Feeder Buses, langkar enggau chara bejalaika nya bepanggai ba peneka enggau guna di mengeri.

“Bansa perengka pengangkut enggau teknologi kuasa baru deka meransang pengawa ngena kuasa beresi, ke alai aku arap bendar bas elekterik ulih ditumbuhka enggau bas hidrogen dalam sistem perengka pengangkut mensia mayuh.

“Juluk kitai deka ngena perengka pengangkut ti beratka kuasa beresi sereta enggau bererenggat ngetuka bas ti ngena diesel. Udah nya Sarawak ulih nyadi generasyen rumah kuasa elekterik ba rantau tu,” ku iya.

Bejaku baru, iya madahka besai amat guna ngembuan chara ti mungkur semua pekara ba pengawa ngemansangka sistem perengka pengangkut mensia mayuh ari sukut langkar, perambu enggau chara ngemeranka laban ngaga jalai alun enggau jematan ukai chara dikena mutarka penanggul dalam timpuh panjai.

Nya kebuah ku iya, perintah Sarawak ngepunka projek LRT di Kuching taja pan ditangguh dulu laban kitai berat sereta mekuh ngagai pengawa nyendiaka bekal ai, karan eggau jalai alun sereta pemansang infrastruktur bukai dikena ngerapitka takah menua pesisir enggau mengeri.

“Taja pia kitai deka neruska LRT ti mungkur Samarahan ke Kuching ti udah kelalu sekut. Taja pia pekara tu deka diperundingka sereta pemutus kepenudi deka dipadahka lebuh datai ba maya iya.

Kelimpah ari nya iya madahka, baka ke ditemu mayuh nengeri bukai di Semenanjung Malaysia nyendiaka servis bas nadai bebayar lalu pekara ti sama deka diperundingka ba nengeri tu.

“Kami deka bejalaika pansik komprehensif pasal inisiatif ‘people-centric’ tu.

“Kami pechaya tu ukai semina ulih mutarka penanggul penyekut ba jalai alun di mengeri tang pemadu beguna ngurangka ungkus belanja pengidup ti tinggi peranak mengeri enggau menua pesisir sereta meri penguntung ngagai semua rayat Sarawak,” ku iya.

Kelimpah ari nya dalam aum pengarang berita, Masing madahka kerejasama China enggau kompeni peribit menua tu ba pengawa bejalaika projek bas elekterik amat senipak bendar kelebih agi Sarawak nyadi palan keterubah endur bejadika produk rasmi keterubah.

Kebuah pia ku iya, Sarawak ngembuan pengaya pemansut kuasa nengah tekat hidroelekterik.

“Kitai bisi urung 4,700 megawatt kuasa ke ulih diasilka ari empat tekat hidroeleterik lalu ke pemadu besai empangan Bakun, Murum, Batang Ai enggau ke jemah ila Tekat Hidroeleterik Baleh.

“Aku ngasaika Kuching dipilih CRRC endang senipak bendar nyadi palan ngepunka projek pemungkal,” ku iya.

  • oleh
  • Advertisement