Anda di sini

UPP udah nganjung pom nukar nama enggau lambang parti ngagai ROS

Advertisement
 George (tengah) nyuaka pom pinta nukar nama enggau lambang parti ngagai Georgina. Bela dipeda Margaret (kiba).
NGANJUNG PEMINTA: George (tengah) nyuaka pom pinta nukar nama enggau lambang parti ngagai Georgina. Bela dipeda Margaret (kiba).

KUCHING: Parti Rakyat Bersatu (UPP) kemari nganjung pom nukar nama enggau lambang parti ke baru ngagai Opis Pengerijista Gerempung (ROS) Sarawak di Jalai Wan Alwi ditu.

Pom nukar nama UPP ngagai Parti Sarawak Bersatu(PSB) sereta logo baru nya disua Sekretari Besai UPP George Lo lalu diterima Direktor ROS Sarawak Georgina Apphia Ngau.

“Kitai meseti nitihka atur nengah akta gerempung alai nama parti enggau logo semina ulih ditukar nengah pemendar ari ROS.

“Ba sukut undang-undang diatu kitai mengkang UPP..kitai semina ulih ngena PSB pengudah ROS ngemendar pinta tu,’ku George bejaku ngagai pemberita pengudah nyuaka pom nya kemari.

Dulu agi ari nya, Georgina madah ngagai pemberita diak ROS pampang Sarawak enda ngenah pinta ari gerempung ke bekait enggau politik.

Ku iya, pinta dirijista ba ROS ungkup tetiap parti politik semina dinah indu opis ROS di Kuala Lumpur.

Ketegal nya, George madah UPP minta saup Georgina ngelengkas atur nganjung pom nya ngagai opis di Kuala Lumpur lalu diberi pemendar.

“Ngarap indu opis ROS di Kuala Lumpur ulih ngelengkas pinta kitai dirijista ngambika kitai ulih nguna nama enggau logo baru.

“Iya (Georgina) mega madah ngagai kami diak enti pinta nya dikenatai nengah sistem komputer, pinta ngadu ubah nya begunaka timpuh 23 hari.

“Ketegal pom tu dianjung jari, engka ulih pandak agi ari timpuh nya, lalu engka mega tau lama agi ari nya,’ku George.

Kelimpah ari nya, George mega madah ROS deka dulu meresa sekali PSB udah dikena gerempung bukai.

Aku nemu PBS udah dikena gerempung bukai alai ketegal nya kitai enda ngena PBS, ngarap PSB nadai,’ku iya.

Bela nyempulang George, Sekretari Eksekutif UPP Margaret Fong.

Advertisement