Anda di sini

UNIMAS deka terus bejalaika pansik ba sistem hidro mikro

Advertisement
 Seraban pemansik ari Makmal Analisis Tenaga Lestari, UniKL, CREN, UNIMAS bejalaika pansik ba Kpg Assum, Padawan. — Gambar pemeri UNIMAS
NGAGA PANSIK: Seraban pemansik ari Makmal Analisis Tenaga Lestari, UniKL, CREN, UNIMAS bejalaika pansik ba Kpg Assum, Padawan. — Gambar pemeri UNIMAS

KUCHING: Peminta bekal kuasa karan ukai semina ungkup sida ti diau ba kandang mengeri aja tang mega ba kandang menua pesisir enggau menua ulu.

Ba Malaysia, pengawa meri bekal kuasa karan ba kandang menua ulu antara pengawa dipejalai nengah pejalai sistem hidro mikro ba sungai ti bepengulih tinggi enggau engkeman endur ngemansangka sistem nya.

Tang gaya rampa menua tu enggau ubah gaya hari udah mangka penyikar sistem ti dikemansang ngena teknologi tu.

Antara pemar ti ditapi nyengkaum penanggul tekerap, uras tepagang, ubah komposisi ai, tanah tusur enggau ai majak pabu.

Tanah tekerap datai ari pasir, kerangan enggau sedimen sereta uras ti bepun ari daun enggau rangkang kayu ngelingi sungai ti ditabanka arus ngujungka turbin balat rusak.

Dikena nentuka operasyen optimum, pengawa ngupas ti suah agi patut dipejalai dikena ngurangka tanah tekerap enggau uras tepagang.

Taja pia, pangku pengawa ngupas mar dipejalai maya musim pengujan ketegal tanah tekerap majak nambah lalu uras mega mayuh.

Pugu pekara rampa ngelingi enggau gaya hari nyata bebida ngujungka teknologi ke bisi ti dikena ba menua luar enda entu engkeman dikemeran ba sistem sistem hidro mikro menua tu.  

Ba pengawa mutarka penanggul tu, seraban pemansik ari Makmal Analisis Tenaga Lestari, Universiti Kuala Lumpur (UniKL), enggau kerejasama Palan Kuasa Ulih Dikena Baru (CREN), Universiti Malaysia Sarawak (UNIMAS) bela begulai ngemansangka teknologi ngintu tanah tekerap ti dikena ba sistem hidro mikro menua tu.  

Diketuaika Professor Madya Dr. Engku Ahmad Azrulhisham ari UniKL, pansik tu ngaul gaya langkar injinir prototaip ke alai chuan penerang rampa ngelingi enggau hidrologi diulih ari perengka guna hidro mikro Kampung Assum Padawan, semak ditu.

Perengka guna tu di baruh intu CREN UNIMAS lalu nyadi endur bejalaika pansik bidang hidro mikro kelimpah meri bekal kuasa karan ungkup guna industri menua pesisir ditu.

Gaya langkar struktur sistem ti berundingka chuan penerang hidrologi sereta penemu ti dikembuan peranak menua bekaul enggau rampa menua asal ti endur sida diau, nyengkaum guna tanah deka diadu ke dalam model Dinamik Benda Alih Berkomputer (CFD).

Program pansik di baruh pelanja Akaun Amanah Industri Bekalan Elektrik (AAIBE), Opis Menteri Kuasa, Sains, Teknologi, Rampa Menua enggau Ubah Gaya Hari (MESTECC) tu nampung pengawa ari kaul bala pemansik kededua institusyen pelajar tinggi nya ba bidang mansutka kuasa ulih dikena baru (RE) ti udah berengkah kenyau ari taun 2014.

Advertisement