MIRI: Sepenyampau 103 peranak rumah panjai ari Kuala Tatau nerima cheremin mata baru diberi nengah projek Sarawak Oil Palms Berhad (SOPB) apin lama ke udah.
Pengawa nyuaka cheremin nya diatur kena 5 Disember tu tadi ba Rumah Buli Jamit, Sungai Semanok, Kuala Tatau.
Penerima datai ari lebih 10 buah rumah panjai ba sitak operasyen SPOB di Kuala Tatau ti sebedau tu beperesa mata dalam bulan November.
Pengari ari Opis Servis Perintah SPOB Enki Pati berkata, ari 103 penerima nya, 15 penerima dituku bisi penanggul mata lalu patut diperubat silik ba Klinik Pengerai Jepak.
“Tu ngambika pesakit beperesa silik agi nentu sekalika pesakit beputung pterygium tauka beputung selaput mata.”
“Beputung deka diatur ba Sepital Besai Bintulu lalu dipelanja SPOB. Pemutus naka diatu ngenuku empat iku ari pesakit nya beperesa silik ba sepital ngambika diperesa enggau beputung,” ku iya.
Sama datai Menijar Ladang SOPB Budut Tumbai enggau Benedict Baja Malila, Tuai Rumah Buli Jamit ari Sungai Semanok enggau Tuai Rumah Lebong Luang ari Sungai Seterus sereta bala staf ari indu opis SOPB.
Ba lansa bukai, bala tuai rumah meri terima kasih ngagai SOPB ba komitmen timpuh panjai sida mantu komuniti menua nya nengah program baka nya.
Projek SOPB Vision Care nyadi siti ari projek tanggungpengawa rama serikat enggau tuju nyeliahka penanggul ti tau ngasuh buta ngagai komuniti menua pesisir lalu mantu sida nerima perubat mata.