LIMBANG: Perintah nengeri deka ngagihka belanja penyampau RM6 juta ngagai CIQ di Bagi Menua Limbang lalu deka berunding mayuh agi ba pengawa nimbal peminta ungkup ngemanah enggau nyeleti perengka guna ti enda dikeibuhka Perintah Besai.
Sapit Kepala Menteri Datuk Amar Awang Tengah Ali Hasan mansutka jaku tu rambau Pengerami Makai Lemai Ngenang Jasa Opis Imigresyen Limbang ba Balai Komuniti Kampung Bunga Raya kena Hari Enam.
Tu deka diagih nengah Ejensi Koridor Wilayah Utara (NRDA) lalu Kepala Menteri udah meri pemendar iya,” ku iya.
Pekara penerit adat mansa garis entara menua ba bagi menua enggau nengeri tu patut ditambah agi dikena mutarka sebarang pekara ti tau ngeruga enggau ngemai tama chara belalai ti tau ngeruga pengelikun menua lalu pintu penama ba Limbang enggau Lawas, pelilih menua ti suah napi sebarang pengawa tama belalai nengah langit, darat enggau tasik enti enda diputar nitihka pematut.
Iya minta ngambika atur diteritka agi dikena nyeliahka Limbang enggau Lawas nyadi palan ngenduh aktiviti belalai, kelebih agi sida ti ngemai dadah syabu tama.
“Pelilih Limbang enggau Lawas bisi jalai tama nengah darat, ai enggau langit lalu bala pemesai Imigresyen endang menggi tanggungpengawa nentuka pintu penama bagi menua enggau nengeri tu likun ari sebarang pengawa salah.
Awang Tengah, Menteri Pemansang Mengeri Enggau Pengeraja Asal Kedua enggau Menteri Industri enggau Pemansang Pengawa Dagang Sarawak madahka RM6 juta udah diagih berindik peminta ari Opis Imigresyen di Limbang ti udah dibai ngagai perati iya.
Iya mega ngelalau bala pemesai opis di Lawas nganjung peminta ngagai iya ungkup agih belanja di baruh NRDA, ke alai iya nyadi chairman, dikena ngemanahka perengka guna, nyengkaum agu ba CIQ dalam pelilih nya.
Sapit Kepala Menteri madahka Sarawak enda deka nunduk pasal kuasa otonomi nengeri baka udah disempekat ba Sempekat Malaysia 1963 (MA63) enggau Konstitusyen Perintah Besai.
Iya mejah ulah sida ti mempersoalkan hak perintah nengeri ti nagang individu enda disagi tama ngagai nengeri tu.
“Sebedau ngaga pemutus, kitai udah bisi ripot pasal orang nya enggau pangka penatai sida ngagai nengeri tu ti tau ngeruga pengelantang rayat ditu.
Penetap penemu Sarawak dikena nyaga nengeri tu ditama raban ektremis ti tau ngerusak penyerakup, pengelantang peranak Sarawak endang enda ulih dipersoalkan sida ngachau nengeri ti deka ngemunaska pengawa nyaga tu.
Sama datai ba pengerami nya Sapit Direktor Imigresyen Limbang Hamfatullah Syawal, pengari Pemesai Pelilih Limbang Hamidah Halpi, Datuk Bandaraya Kaunsil Pelilih Limbang (MDL) Kaunsilor Sufian Mohat enggau Ketuai Imigresyen Bagi Menua Limbang Kalthom Ahmad sereta bala pengari ari Miri enggau Kedutaan Malaysia di Brunei.